الماتىدا وقۋشى بالا ەرەسەك نەمەرە اعاسىن ايىپتادى. جابىرلەنۋشى اعاسىنىڭ جىنىستىق زورلىق جاساعانىن مالىمدەگەن، دەپ حابارلايدى "ادىرنا" ۇلتتىق پورتالى.
بۇل اقپارات الەۋمەتتىك جەلىدە تاراعان.
بەلگىلى قۇقىق قورعاۋشى ايمان وماروۆا وقۋشىنىڭ جاعدايى تۋرالى العاشقىلاردىڭ ءبىرى بولىپ حابارلاعان. جابىرلەنۋشى 19 اقپاندا كومەك سۇراعان.
«ۇلدى اكەسى قايتىس بولعاننان كەيىن اكەسىنىڭ اعاسى تاربيەلەۋ ءۇشىن اناسىنان سۇراپ الىپ كەتكەن. بولجام بويىنشا، ايەل ءۇش بالانىڭ اناسى. ول ۇلدى جانە ونىڭ 2 اپكەسىن تۇگەل اسىراۋعا شاماسى جەتپەگەن. بالا 11 جاستا بولعاندا اعاسىنىڭ ۇلى وعان جىنىستىق زورلىق-زومبىلىق جاساي باستاپتى. بۇل شامامەن ءۇش جىلعا سوزىلعان. بالا بۇل تۋرالى ەشكىمگە ايتپاعان. الايدا ۇل بالا شىداي الماي، اپكەسىنە قاشىپ كەتىپ، بار جاعدايدى بايانداپ بەرگەن»، - دەيدى قۇقىق قورعاۋشى ايمان وماروۆا.
اپكەسى ىنىسىمەن بىرگە پوليتسياعا ارىز جازۋ ءۇشىن بارعانىمەن، ارىز قابىلدانباعان. جابىرلەنۋشىلەر پوليتسياعا اعاسىنىڭ تۋىستارى كەلىپ، قىسىم كورسەتكەنىن دە مالىمدەدى.
پوليتسيا دەپارتامەنتى اقپاراتقا تۇسىنىكتەمە بەردى.
«بيىلعى جىلدىڭ 19 اقپانىندا جەتىسۋ اۋدانىنىڭ پوليتسيا بولىمىنە ىنىسىنە قاتىستى سەكسۋالدىق سيپاتتاعى زورلىق-زومبىلىق فاكتىسى بويىنشا الماتى وبلىسىنىڭ تۇرعىنى ءوتىنىش ءبىلدىردى. وسى فاكتى بويىنشا قىلمىستىق ءىس قوزعالدى. ءجاسوسپىرىمنىڭ تۋىسى پوليتسياعا جەتكىزىلدى. تەرگەۋ امالدارى جۇرگىزىلۋدە»، دەپ حابارلادى ۆەدومستۆو.
پوليتسيا سوتقا دەيىنگى تەرگەۋ اياسىندا سوت-مەديتسينالىق ساراپتاما تاعايىندالعانىن ايتتى.
