Ulytaý oblysyndaǵy «Qazaqmys» korporaııasyna qarasty «Jomart» ken ornynda bolǵan qaıǵyly oqıǵadan keıin májilis depýtattary eńbek qaýipsizdigin kúsheıtý máselesin kóterdi, dep habarlaıdy "Adyrna" ulttyq portaly.
Májilis otyrysynda depýtat Arman Qalyqov elimizdegi ónerkásiptik qaýipsizdik júıesin túbegeıli qaıta qaraý qajettigin málimdedi. Onyń aıtýynsha, «Qazaqmys» kásiporyndaryndaǵy jazataıym oqıǵalardyń jıileýi saladaǵy baqylaý men qaýipsizdik standarttarynyń álsiregenin kórsetedi.
«Qaýipti óndiristerde qaýipsizdik máselelerin qamtamasyz etetin memlekettik ınstıtýttar joıyldy. Sonyń saldarynan biz joǵary bilikti mamandar men ınspektorlardy joǵaltyp, ǵylymı-ádistemelik bazadan aıyryldyq. Bul jaǵdaı tehnogendik qaýipsizdikke keri áserin tıgizdi», – dedi depýtat.
Ol mundaı oqıǵalardyń Qazaqstandaǵy ken oryndary men shahtalarynda jyl saıyn qaıtalanatynyn alǵa tartyp, ónerkásiptik qaýipsizdikti qamtamasyz etetin memlekettik ınstıtýttardyń mańyzdylyǵyn atap ótti.
"Nege joǵary paıda ákeletin kásiporyn jyldar boıy eńbek qaýipsizdigin qamtamasyz etpeı keledi?! Mundaı tehnogendik apattar jyl saıyn elimizdiń ken oryndarynda, shahtalarynda, munaı ken oryndarynda qaıtalanady. Bul ónerkásiptik qaýipsizdik memlekettik ınstıtýttarynyń mańyzdylyǵy men qajettiligin aıqyndaıdy", — dedi ol.
Depýtattar "Qazaqmys"-tyń jumysyna qatysty birneshe usynys aıtty.
- Ónerkásiptik qaýipsizdik máselelerimen aınalysatyn, tikeleı premer-mınıstrge baǵynatyn jeke memlekettik organ qurý;
- Qaýipti óndiristerde jumys isteıtin qyzmetkerlerdiń ómiri men densaýlyǵyn saqtandyrý júıesin jetildirý;
- Kenishterdiń jeldetý júıelerin normatıvterge sáıkestigin tekserý;
- Taý-ken kásiporyndaryndaǵy jabdyqtar men tehnologııalardy jańǵyrtýǵa qarjy bólýdi qamtamasyz etý.
Eske sala keteıik, 17 aqpanda Ulytaý oblysynyń Jańaarqa aýdanynda ornalasqan «Jomart» ken ornynda taý jynysy opyrylyp túsip, jeti kenshi qaza tapqan.
