انتاليا – استانا رەيسىندە توبەلەس شىعارعان قازاقستاندىقتارعا 60 ملن تەڭگە ايىپپۇل سالىنۋى مۇمكىن، دەپ حابارلايدى "ادىرنا" ۇلتتىق پورتالى.
Pegasus Airlines اۋە كومپانياسى انتاليا – استانا رەيسىندە جانجال شىعارعان ەكى قازاقستاندىق جولاۋشىدان 60 ميلليون تەڭگە، شامامەن 120 مىڭ دوللار، كولەمىندە ايىپپۇل تولەۋىن تالاپ ەتۋدە.
ۇشۋ كەزىندە قازاقستان ازاماتتارى مەن ۋكراينالىق ەرلى-زايىپتىلار اراسىندا جانجال تۋىنداپ، ول توبەلەسكە ۇلاسقان. ەكيپاج جولاۋشىلاردى ساباسىنا تۇسىرە الماعاندىقتان، ۇشقىشتار تۇركيانىڭ ەرزۋرۋم قالاسىنا شۇعىل قونۋ تۋرالى شەشىم قابىلداعان.
قونۋ بارىسىندا جانجالعا قاتىسۋشىلاردى مەديتسينالىق تەكسەرۋدەن وتكىزىپ، پوليتسياعا تاپسىرعان. ۇشاق جانارماي قۇيىپ، بۇزاقى جولاۋشىلارسىز استاناعا قاراي ۇشۋدى جالعاستىرعان.
Pegasus Airlines كومپانياسى جولاۋشىلاردان ۇشاقتىڭ شۇعىل قونۋىنا، جانارماي قۇيۋىنا جانە رەيستىڭ كەشىگۋىنە بايلانىستى كەلتىرىلگەن شىعىندى وتەۋدى تالاپ ەتۋدە. سونداي-اق، ولار اۋە كەمەسىندە بۇزاقىلىق جاساعانى ءۇشىن قىلمىستىق جاۋاپكەرشىلىككە تارتىلۋى مۇمكىن.
«تۋريستىك قامقور» قورىنىڭ ءتورايىمى يننا رەي بۇل وقيعانىڭ سالدارى اۋقىمدى ەكەنىن اتاپ ءوتتى. ونىڭ ايتۋىنشا، رەيستىڭ كەشىگۋى اۋە كومپانياسى ءۇشىن قوسىمشا شىعىندارعا، سونىڭ ىشىندە رەزەرۆتىك ۇشاق ىزدەۋگە اكەلۋى مۇمكىن.
وقيعاعا قاتىستى تۇپكىلىكتى شەشىمدى سوت قابىلدايدى
