قازاقستاندىق دزيۋدوشىلار فرانتسيا مەن شۆەيتسارياداعى قازاقستان ەلشىلىكتەرىنە كيىز ءۇي سىيلادى، دەپ حابارلايدى "ادىرنا" ۇلتتىق پورتالى قازتاگ-كە سىلتەپ.
كيىز ۇيلەر ەلشىلىكتەر اۋماعىندا تىگىلىپ، قازاق مادەنيەتىن حالىقارالىق دەڭگەيدە ناسيحاتتاۋ جانە مادەني بايلانىستى نىعايتۋ ماقساتىندا قويىلعان.
دەلەگاتسيا قۇرامىندا JENYS كاسىبي كلۋبىنىڭ پرەزيدەنتى الماز السەنوۆ، قاراعاندى وبلىسىنىڭ دزيۋدو فەدەراتسياسىنىڭ پرەزيدەنتى تيمۋر تۇرسىنباەۆ جانە 2024 جىلعى پاريج وليمپياداسىنىڭ چەمپيونى ەلدوس سمەتوۆ بولدى.
ۇيىمداستىرۋشىلار بۇل باستاما قازاق مادەنيەتى مەن سپورتىنىڭ ماڭىزدىلىعىن كورسەتىپ، حالىقتار اراسىنداعى دوستىق پەن ىنتىماقتاستىقتى نىعايتۋعا ىقپال ەتەتىنىن اتاپ ءوتتى.
ء"بىز ءوز ەلىمىزدىڭ مادەني بايلانىستارىن نىعايتۋعا ۇلەس قوسقانىمىزعا قۋانىشتىمىز. بۇل – بىزگە كورسەتىلگەن قولداۋعا جانە ىنتىماقتاستىققا دەگەن العىسىمىزدىڭ بەلگىسى. مۇنداي سىيلىقتار قازاقستان مەن فرانتسيا، سونداي-اق قازاقستان مەن شۆەيتساريا اراسىنداعى قارىم-قاتىناستاردى ودان ءارى نىعايتۋعا ىقپال ەتەدى", – دەدى السەنوۆ.
پاريجدەگى شارانى قازاقستاننىڭ فرانتسياداعى ەلشىسى گۇلسارا ارىستانقۇلوۆا ۇيىمداستىرسا، جەنەۆاداعى رەسمي قابىلداۋ قازاقستاننىڭ بۇۇ جانىنداعى تۇراقتى وكىلى ەرلان الىمباەۆتىڭ قولداۋىمەن ءوتتى.
