ۋكراينا پرەزيدەنتى ۆلاديمير زەلەنسكي ساۋد ارابياسىندا وتكەن رەسەي مەن اقش دەلەگاتسيالارى اراسىنداعى كەلىسسوزدەرگە قاتىستى پىكىر ءبىلدىرىپ، بۇل كەزدەسۋدە ۋكراينا ماسەلەسى قارالىپ جاتقانىمەن، كيەۆتىڭ قاتىسپاعانىن اتاپ ءوتتى. ول ۋكراينا ەشقاشان ماسكەۋدىڭ ۋلتيماتۋمدارىن قابىلدامايتىنىن مالىمدەدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
زەلەنسكيدىڭ ايتۋىنشا، رەسەي سوعىستىڭ باسىندا ۋكراينادان ارميا سانىن قىسقارتۋدى، كەيبىر تەرريتوريالاردان باس تارتۋدى تالاپ ەتكەن. الايدا كيەۆ بۇل تالاپتاردى قابىلداماعان.
زەلەنسكي اقش پەن رەسەي اراسىنداعى كەزدەسۋ تۋرالى الدىن الا حاباردار بولماعانىن جانە بۇل جاعداي ۋكراينا ءۇشىن كۇتپەگەن جاڭالىق بولعانىن مالىمدەدى. وسى سەبەپتى ول ساۋد ارابياسىنا جوسپارلانعان ساپارىن كەيىنگە شەگەرىپ، 10 ناۋرىزدا رەسمي ساپارمەن باراتىنىن حابارلادى.
زەلەنسكي رەسەيمەن ەشقانداي كەلىسىم جاسالماعانىن تاعى دا ەسكە سالدى.
ء"بىز كيەۆ وبلىسى وككۋپاتسيالانعان كەزدە دە، بەلارۋستەگى كەلىسسوزدەردە دە، تۇركياداعى كەزدەسۋلەردە دە ەشقانداي كەلىسىمگە كەلگەن جوقپىز. مەن، ۋكراينا پرەزيدەنتى رەتىندە، ەشكىمگە ەشتەڭە كەپىلدىك بەرگەن جوقپىن، ەشتەڭەنى راستامادىم. ال رەسەيدىڭ ۋلتيماتۋمدارىن قابىلداۋ ويىمدا دا جوق، ءارى قابىلدامايمىن", – دەپ تۇيىندەدى ول.
اقش مەملەكەتتىك دەپارتامەنتى ەر-ريادتاعى كەزدەسۋدى ۋكرايناعا قاتىستى بەيبىت كەلىسسوزدەردىڭ باستالۋى رەتىندە ەمەس، اقش پەن رەسەي پرەزيدەنتتەرى اراسىنداعى تەلەفون ارقىلى جۇرگىزىلگەن كەلىسسوزدەردىڭ جالعاسى رەتىندە قاراستىرۋ قاجەت ەكەنىن مالىمدەدى.
كەلىسسوزدەر بارىسىندا رەسەي مەن اقش دەلەگاتسيالارى ەكى ەل باسشىلارىنىڭ كەزدەسۋ مۇمكىندىگىن جانە رەسەيدىڭ ۋكرايناداعى سوعىسىن اياقتاۋ بويىنشا ارنايى وكىلدەر تاعايىنداۋ ماسەلەسىن تالقىلادى.
