2024 جىلدىڭ قورىتىندىسى بويىنشا جەتىسۋ وبلىسى ەكونوميكاسىنا 522 ميلليارد تەڭگە ينۆەستيتسيا قۇيىلعان. بۇل 2023 جىلعى كورسەتكىشتەن 1,4 ەسەگە ارتىق. ونىڭ ىشىندە جەكە ينۆەستيتسيانىڭ ۇلەسى 394 ميلليارد تەڭگەنى قۇرادى، بۇل الدىڭعى جىلدان 1,7 ەسەگە ءوستى. جالپى وتكەن جىلدىڭ قورىتىندىسىندا قىسقا مەرزىمدى ەكونوميكالىق ينديكاتور بويىنشا كورسەتكىش وبلىستا 114,8 % قۇراپ، رەسپۋبليكادا 2-ءشى ورىننان كورىندى. بۇل تۋرالى وبلىس اكىمى بەيبىت يساباەۆ «Jetisy» تەلەارناسى ستۋدياسىندا وبلىستىق باق وكىلدەرىنە بەرگەن كەڭەيتىلگەن سۇحباتى بارىسىندا ايتتى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ءوڭىر باسشىسىنىڭ ايتۋىنشا، وتكەن جىلى ونەركاسىپ سالاسىندا 200 جۇمىس ورنىن اشقان «Asma Industrial» وندىرىستىك اككۋمۋلياتورلار زاۋىتى ىسكە كىرىستى. سونىمەن قاتار ءبىراز جىل بويى جۇمىسى توقتاپ تۇرعان مايلى داقىلدار وڭدەيتىن «جەتىسۋ ماجيكو» اگروكەشەنى بىلتىر قايتا ىسكە قوسىلدى.
- ال بيىلعى جىلدىڭ جوسپارىنا كەلسەك، تالدىقورعانداعى «قاينار اكب» زاۋىتىنىڭ ونەركاسىپتىك اككۋمۋلياتور باتارەيالارىن شىعاراتىن جاڭا جوباسى ىسكە اسىرىلادى. جوبانىڭ قۇنى 10 ميلليارد تەڭگەدەن اسادى، 150 جۇمىس ورنىن اشۋ مەجەلەنگەن. بۇدان بولەك، بيىل كەربۇلاق اۋدانىندا ەڭ ءىرى ينۆەستيتسيالىق جوبا تاۋ-كەن مەتاللۋرگيا كومبيناتى ىسكە قوسىلادى. قۇنى 1,3 تريلليون تەڭگە. كومبيناتتا 2000 جۇمىس ورنى اشىلىپ، جەرگىلىكتى جۇرتشىلىقتى جۇمىسپەن قامتيدى. وتكەن جىلى وسى جوبا بويىنشا تەمىرجول جەلىسى، قويما عيماراتتارى سالىنعان بولاتىن. ال بيىل قۇرىلىس-مونتاج جۇمىستارى باستالادى. تالدىقورعانداعى «باسقۋات» جىلىتۋ قازاندىعىنىڭ اۋماعىندا تۇرمىستىق قالدىقتى قايتا وڭدەۋدەن وتكىزەتىن زاۋىتتىڭ قۇرىلىسى جۇرەدى، كەلەسى جىلى قۇرىلىستى اياقتاۋ جوسپاردا بار، - دەدى ب. يساباەۆ.
ءوڭىردىڭ كولىك-لوگيستيكالىق الەۋەتى جايىنا توقتالعان ءوڭىر باسشىسى «قورعاس – شىعىس قاقپاسى» ارنايى ەكونوميكالىق ايماعى وبلىستىڭ ەكونوميكالىق ءوسۋ نۇكتەسى ەكەنىن اتاپ ءوتتى.
مىسالى، جىل باسىندا جەل گەنەراتورلارى مەن ەنەرگيا جيناقتاۋ جۇيەلەرىن شىعاراتىن زاماناۋي زاۋىت سالۋ جوباسى ىسكە اسىرىلا باستالدى. جوبانىڭ قۇنى - 40 ملن اقش دوللارى، 300-دەن استام جۇمىس ورنى اشىلادى.
بيىلعى جىلدىڭ سوڭىنا قاراي ارنايى ەكونوميكالىق ايماق اۋماعىندا «SKYHANSA» جشس زاماناۋي ۇلگىدەگى اۋەجايدىڭ قۇرىلىسى باستايدى دەپ كۇتىلۋدە. جۇك جانە جولاۋشىلار تەرمينالىن قامتيتىن جوبا قولعا الىنادى. ونىڭ قۇنى 250 ميلليارد تەڭگە.
قىسقاشا ايتقاندا، 2025-2027 جىلدارى جەتىسۋ وبلىسىندا 120-دان استام ينۆەستيتسيالىق جوبا جۇزەگە اسىرىلىپ، 10 مىڭنان استام جۇمىس ورنى اشىلادى.
وبلىس اكىمى اتاپ وتكەندەي، ەل پرەزيدەنتىنىڭ تاپسىرمالارىن ەسكەرە وتىرىپ، ءوڭىردى دامىتۋدىڭ وسى جىلعا ارنالعان بىرنەشە نەگىزگى باعىتتارى ايقىندالدى. ولاردىڭ قاتارىندا اۋىل شارۋاشىلىعى ونىمدەرىن وڭدەۋ، ونەركاسىپ سەكتورىن دامىتۋ، تۋريزم، تسيفرلاندىرۋ سالالارى بار.
