قازاقستاندىق بەلگىلى رەجيسسەر رۇستەم ابدىراشەۆتىڭ «Fake-وۆىي ارمان» اتتى جاڭا كارتيناسى 27 اقپاندا پروكاتقا شىعادى. تۋىندى قازاقتىڭ ۇلتتىق «كوكپار» ويىنىن جاقسى كورەتىن اعايىندى ەكى جىگىت قۇرماش پەن باحانىڭ ءومىرى تۋرالى.
«تۋىندى كوكپار دەسە ىشكەن اسىن جەرگە قويىپ، ءبىر يىعىن بەرىپ تۇراتىن جىگىتتەردىڭ تارتىسىن سۋرەتتەيدى. شىعارماشىلىق ۇجىم ۇلتتىق فيلمدە ۇلتتىق قۇندىلىقتاردىڭ كورىنىس تابۋىنا ەرەكشە باسىمدىق بەردى. قازاقىلىقتىڭ ءيىسى اڭقىعان تۋىندى كوپ ۇزاماي پروكاتقا شىعىپ، كورەرمەنگە ۇسىنىلاتىن بولادى»، – دەدى رەجيسسەر.
فيلم جەلىسى بويىنشا اعايىندى باحا پەن قۇرماشتى باتىلدار مەن ەپتىلەر وينايتىن كوكپار سايىسىنىڭ ەركىندىگى وزىنە تارتادى. اعايىندىلاردىڭ كىشىسى قۇرماش كۋرەر بولىپ جۇمىس ىستەيدى. قۇرماشتىڭ كۇندەلىكتى جۇمىسى ارقىلى كورەرمەن كۋرەرلىك ءىستىڭ بارلىق شىندىعىن باعامدايدى. ال اعاسى باحا اۋىلدا تۇرادى، ول – كىشىگىرىم شارۋاشىلىقتى دوڭگەلەتىپ وتىرعان ءۇيدىڭ ۇلكەنى.
اعايىندى ەكى جىگىتتىڭ ءوز ءومىرى، ماحابباتى مەن ارماندارى، وعان جەتەتىن وزىندىك جولى بار. ولار سول ماقساتىنا قول جەتكىزە الا ما، الدە شىنايى قۇندىلىقتار ارزانداعان، گاجدەت-سمارتفوندار الەمىندە ايالاعان ارماندارى الدامشى بولىپ قالا ما، ونى ءفيلمنىڭ سوڭى كورسەتەدى.
فيلم اقپارات جانە مادەنيەت مينيسترلىگى، ۇلتتىق كينو ورتالىعىنىڭ قولداۋىمەن تۇسىرىلگەن. ستسەناريىن جازعان رۇستەم ابدىراشەۆ پەن عازيز ناسىروۆ. كارتينانىڭ پروديۋسەرلەرى – ءمادينا ەسمانوۆا جانە ازات جاپەكوۆ. باستى رولدەردە ويناعاندار: ەربول سەمقۇلوۆ، ولجاس توعىمبەت ،ەرجان ءتۇسىپوۆ،اقبوتا ابدىبەك جانە سۆەتلانا تاراسوۆا.
