Qazaqstandyq belgili rejısser Rústem Ábdirashevtiń «Fake-ovyı arman» atty jańa kartınasy 27 aqpanda prokatqa shyǵady. Týyndy qazaqtyń ulttyq «Kókpar» oıynyn jaqsy kóretin aǵaıyndy eki jigit Qurmash pen Bahanyń ómiri týraly.
«Týyndy kókpar dese ishken asyn jerge qoıyp, bir ıyǵyn berip turatyn jigitterdiń tartysyn sýretteıdi. Shyǵarmashylyq ujym ulttyq fılmde ulttyq qundylyqtardyń kórinis tabýyna erekshe basymdyq berdi. Qazaqylyqtyń ıisi ańqyǵan týyndy kóp uzamaı prokatqa shyǵyp, kórermenge usynylatyn bolady», – dedi rejısser.
Fılm jelisi boıynsha aǵaıyndy Baha pen Qurmashty batyldar men eptiler oınaıtyn kókpar saıysynyń erkindigi ózine tartady. Aǵaıyndylardyń kishisi Qurmash kýrer bolyp jumys isteıdi. Qurmashtyń kúndelikti jumysy arqyly kórermen kýrerlik istiń barlyq shyndyǵyn baǵamdaıdy. Al aǵasy Baha aýylda turady, ol – kishigirim sharýashylyqty dóńgeletip otyrǵan úıdiń úlkeni.
Aǵaıyndy eki jigittiń óz ómiri, mahabbaty men armandary, oǵan jetetin ózindik joly bar. Olar sol maqsatyna qol jetkize ala ma, álde shynaıy qundylyqtar arzandaǵan, gajdet-smartfondar áleminde aıalaǵan armandary aldamshy bolyp qala ma, ony fılmniń sońy kórsetedi.
Fılm Aqparat jáne mádenıet mınıstrligi, Ulttyq kıno ortalyǵynyń qoldaýymen túsirilgen. Senarııin jazǵan Rústem Ábdirashev pen Ǵazız Nasyrov. Kartınanyń prodıýserleri – Mádına Esmanova jáne Azat Japekov. Basty rólderde oınaǵandar: Erbol Semqulov, Oljas Toǵymbet ,Erjan Túsipov,Aqbota Ábdibek jáne Svetlana Tarasova.
