Aqmola oblysynda Memleket basşysynyŋ bıryŋǧai drondar infraqūrylymyn engızu jönındegı tapsyrmasy aiasynda pilottyq joba ıske qosyldy.
«Bıryŋǧai drondar infraqūrylymy» atty būl joba memlekettık jäne infraqūrylymdyq jobalardy basqarudyŋ aşyqtyǧy men tiımdılıgın arttyruǧa baǧyttalǧan. Jüie mektepter men joldardyŋ qūrylysyn baqylauǧa, jylu jelılerınıŋ jai-küiın qadaǧalauǧa, jer qoinauyn paidalanu salasyndaǧy zaŋbūzuşylyqtardy anyqtauǧa jäne tūrǧyn üi-kommunaldyq şaruaşylyq jūmysynyŋ sapasyn jaqsartuǧa mümkındık beredı.
Oblys äkımdıgınde ötken jiynda Aqmola oblysynyŋ sifrlandyru jäne arhivter basqarmasy «Qazaqtelekom» AQ-men bırlesıp jobany oblys äkımıne tanystyrdy. Prezentasiia barysynda pilotsyz ūşu apparattaryn jedel baqylau men taldau jürgızude paidalanu mümkındıkterı körsetıldı.
Oblys äkımı būl bastamany qoldap, pilottyq kezeŋ aiasynda drondar Kökşetau jäne Qosşy qalalarynda qoldanylatynyn atap öttı. Sonymen qatar, şalǧai eldı mekenderdı tekseru üşın mobildı drondar paidalanylady.
«Sifrlyq tehnologiialar memlekettık basqaru salasynda maŋyzdy röl atqarady. İnnovasiialyq şeşımder körsetıletın qyzmetterdıŋ sapasyn jaqsartuǧa ǧana emes, sonymen qatar yqtimal qauıp-qaterlerdı azaituǧa mümkındık beredı. Aqmola oblysy osyndai ozyq jobalardy engızude pilottyq öŋır boluǧa daiyn», – dedı oblys äkımı Marat Ahmetjanov.
Jobanyŋ negızgı artyqşylyqtarynyŋ bırı – jylu jelılerınıŋ jaǧdaiyn dron arqyly qaşyqtan baqylau. Būl jylu şyǧyndaryn anyqtap, olardy joiu boiynşa uaqtyly şaralar qabyldauǧa mümkındık beredı. Sonymen qatar, drondar jer qoinauyn paidalanu salasyndaǧy zaŋ būzuşylyqtardy tırkep, ekologiialyq normalardyŋ saqtaluyn qamtamasyz etedı.
«Qazırgı tehnologiialardy paidalanu äleumettık nysandar – mektepter men joldardyŋ qūrylysy barysyn naqty uaqyt rejimınde baqylauǧa mümkındık beredı. Būl prosesterdıŋ aşyqtyǧyn qamtamasyz etıp, tiımdılıgın arttyrady jäne basqaruşylyq şeşımderdı jedel qabyldauǧa yqpal etedı», – dep atap öttı Aqmola oblysynyŋ sifrlandyru jäne arhivter basqarmasynyŋ basşysy Maǧjan Erjan.
Jobany jüzege asyru aiasynda Aqmola oblysynyŋ sifrlandyru jäne arhivter basqarmasynyŋ basşysy Maǧjan Erjan men «Qazaqtelekom» AQ-nyŋ sifrlyq biznes divizionynyŋ bas direktory Abylaihan Ospanov özara yntymaqtastyq turaly memorandumǧa qol qoidy.
Aita keteiık, sifrlyq tehnologiialardy damytu jäne zamanaui monitoring qūraldaryn paidalanu – öŋırdı damytudyŋ basym baǧyttarynyŋ bırı. Eger «Bıryŋǧai drondar infraqūrylymy» pilottyq jobasy sättı jüzege assa, ony bükıl oblys aumaǧynda keŋeitu josparlanyp otyr.
