داريعا نازارباەۆانىڭ ۇلى ءنۇرالى اليەۆ «ترانستەلەكوم» اق-داعى ديرەكتورلار كەڭەسى توراعاسى قىزمەتىنەن كەتتى، دەپ حابارلايدى "ادىرنا" ۇلتتىق پورتالى.
بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا حابارلادى.
«10 جىلدان استام ۋاقىت بويى «ترانستەلەكوم» كومپانياسىندا جۇمىس ىستەدىم. ەندى مەن اكتسيونەرلەر قۇرامىنان شىعۋ جانە ديرەكتورلار كەڭەسى توراعاسى رەتىندەگى وكىلەتتىگىمدى توقتاتۋ تۋرالى شەشىم قابىلدادىم»، – دەپ جازدى اليەۆ.
2023 جىلى ءماجىلىس دەپۋتاتى ەرمۇرات ءباپي «ترانستەلەكوم» كومپانياسىنىڭ زاڭسىز جەكەشەلەندىرىلگەنىن مالىمدەگەن بولاتىن. ونىڭ ايتۋىنشا، كومپانيا باستاپقىدا «قازاقستان تەمىر جولى» ۇلتتىق كومپانياسىنا تيەسىلى بولعان. الايدا قۇنى 210 ملرد تەڭگە دەپ باعالانعان كاسىپورىن نەبارى 18,45 ملرد تەڭگەگە ساتىلعان.
دەپۋتاتتىڭ ايتۋىنشا، 2015-2022 جىلدار ارالىعىندا ءنۇرالى اليەۆ «ترانستەلەكومنان» بىرنەشە ميلليارد تەڭگە كولەمىندە ديۆيدەند الىپ وتىرعان.
2023 جىلى 5 شىلدەدە باسەكەلەستىكتى قورعاۋ جانە دامىتۋ اگەنتتىگى «ترانستەلەكوم» كومپانياسىنىڭ نارىقتاعى باسقا وپەراتورلارعا قىسىم جاساعانىن، بۇل باسەكەلەستىك زاڭناماسىن بۇزاتىنىن مالىمدەدى.
