قازاقستانداعى بالالار حيرۋرگياسىنىڭ نەگىزىن قالاۋشى، قوعام قايراتكەرى كامال ورمانتاەۆ 89 جاسىندا ومىردەن ءوتتى، دەپ حابارلايدى "ادىرنا" ۇلتتىق پورتالى.
اكادەميكتىڭ قايتىس بولعانى تۋرالى ونىڭ ۇلى جاراس ورمانتاەۆوزىنىڭ Facebook پاراقشاسىندا جازدى.
«بۇگىن كەشكە مەنىڭ سۇيىكتى اكەم، قازاقستانداعى بالالار حيرۋرگياسىنىڭ نەگىزىن قالاۋشى – اكادەميك كامال ورمانتاەۆ دۇنيەدەن ءوتتى»، – دەپ جازدى ول.
كامال ورمانتاەۆ – پەدياتر-دارىگەر، مەديتسينا عىلىمدارىنىڭ دوكتورى، پروفەسسور، عىلىم قايراتكەرى، قر ۇلتتىق عىلىم اكادەمياسىنىڭ اكادەميگى، قازاقستاننىڭ پروفيلاكتيكالىق مەديتسينا اكادەمياسىنىڭ اكادەميگى جانە ۆيتسە-پرەزيدەنتى، قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى.
1959 جىلى قازممي-ءدىڭ پەدياتريا فاكۋلتەتىن، 1961 جىلى بالالار حيرۋرگياسى كافەدراسىندا كلينيكالىق ورديناتۋرانى، 1965 جىلى الماتى مەديتسينالىق ينستيتۋتىنىڭ گوسپيتالدىق حيرۋرگيا كافەدراسىندا اسپيرانتۋرانى، كەيىن كسرو مەديتسينا عىلىمدارى اكادەمياسىنىڭ پەدياتريا عىلىمي-زەرتتەۋ ينستيتۋتىندا دوكتورانتۋرانى ءتامامدادى.
الماتى مەديتسينالىق ينستيتۋتىنىڭ بالالار حيرۋرگياسى كافەدراسىندا اسسيستەنت، اۋداندىق اۋرۋحانادا پەدياتر-دارىگەر بولىپ جۇمىس ىستەدى. 1968-2011 جىلدارى س. د. اسفەندياروۆ اتىنداعى قازاق مەديتسينالىق ۋنيۆەرسيتەتىنىڭ بالالار حيرۋرگياسى كافەدراسىن باسقاردى. سونىمەن قاتار، الماتى مەديتسينالىق ينستيتۋتىنىڭ پەدياتريا فاكۋلتەتىنىڭ دەكانى (1978-1980, 1989-1991) جانە قازاقستان رەسپۋبليكاسىنىڭ پەدياتريا جانە بالالار حيرۋرگياسى عىلىمي ورتالىعىنىڭ ديرەكتورى (1980-1993) قىزمەتتەرىن اتقاردى.
ول 20 مىڭعا جۋىق حيرۋرگيالىق وپەراتسيا جاساعان. سونداي-اق، قازاقستاندا العاش بولىپ بالالارداعى كەۋدە قۋىسىنىڭ تۋا بىتكەن شۇڭقىر ءتارىزدى دەفورماتسياسىنا توراكوپلاستيكا جاساعان.
