ابۋ-دابيدە دجيۋ-دجيتسۋدان جەڭىسكە جەتكەن حاديا قوناەۆا قازاقستان پرەزيدەنتى قاسىم-جومارت توقاەۆتان العىس حات پەن سىيلىق الدى. سونىمەن قاتار، وعان 1 ميلليون تەڭگەلىك سەرتيفيكات تابىستالدى، دەپ حابارلايدى "ادىرنا" ۇلتتىق پورتالى Kazinform اگەنتتىگىنە سىلتەمە جاساپ.
وتكەن ايدا ابۋ-دابيدە وتكەن الەم چەمپيوناتىندا 6 جاستاعى حاديا ول 11:0 ەسەبىمەن تازا جەڭىسكە جەتتى. مەملەكەت باسشىسىنىڭ سىيلىعىن قىزعا پاۆلودار وبلىسىنىڭ اكىمى اسايىن بايحانوۆ تابىستادى.
ءبىزدىڭ جەرلەسىمىز قازاقستان جاستارىنىڭ رۋحىن، تالانتى مەن ماقساتقا ۇمتىلىسىن كورسەتتى. مۇنداي ماڭىزدى جەڭىستەر جاستايىنان تاباندى ەڭبەكتىڭ ناتيجەسى. ونىڭ جاتتىقتىرۋشىسى - اكەسى سامات قوناەۆ. اكە ۇلگىسى بالالارىن دا جىگەرلەندىردى. بۇگىنگى كۇنى ولاردىڭ بارلىعى سپورت شەبەرى، — دەدى پاۆلودار وبلىسىنىڭ اكىمى اسايىن بايحانوۆ.
ايماق باسشىسى قوناەۆتار وتباسىن كوپتەگەن قازاقستاندىقتار ءۇشىن ۇلگى رەتىندە اتاپ ءوتىپ، جاس چەمپيوننىڭ التىن مەدالىن بۇكىل ەلدىڭ ماقتانىشى رەتىندە باعالادى.
