6 اقپاندا رەسەي پرەزيدەنتى ۆلاديمير ءپۋتيننىڭ شەشىمىمەن "روسكوسموس" مەملەكەتتىك كورپوراتسياسىنىڭ باس ديرەكتورى كەنەتتەن اۋىستىرىلدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
68 جاستاعى يۋري بوريسوۆتىڭ ورنىنا 39 جاستاعى دميتري باكانوۆ تاعايىندالدى. بۇرىن باكانوۆ رەسەيدىڭ كولىك ءمينيسترىنىڭ ورىنباسارى قىزمەتىن اتقارعان.
كرەملدىڭ ءباسپاسوز حاتشىسى دميتري پەسكوۆ بۇل وزگەرىستى كورپوراتسيا قارقىندى دامۋى ءتيىس، سوندىقتان باسشىلىق اۋىستىرىلۋدا" دەپ ءتۇسىندىردى. بوريسوۆ بۇل لاۋازىمدا نەبارى ەكى جارىم جىل قىزمەت ەتتى. مۇنداي كۇردەلى سالادا مۇنداي ۋاقىت ىشىندە ايتارلىقتاي ناتيجەگە جەتۋ قيىن. الايدا "روسكوسموستا" باسشىلىقتىڭ ءجيى اۋىسۋى قالىپتى جاعداي. مىسالى، بوريسوۆتىڭ الدىنداعى دميتري روگوزين ءتورت جىل قىزمەت ەتكەن. بۇل كورپوراتسيا تاريحىنداعى ەڭ ۇزاق مەرزىمدەردىڭ ءبىرى.
دەگەنمەن، كادرلىق وزگەرىستەر "روسكوسموستىڭ" جالپى دامۋ باعىتىن وزگەرتپەدى. رەسەي عارىش سالاسىندا كەڭەس وداعىنان قالعان الەۋەتتى بىرتىندەپ جوعالتىپ، تەك اقش-تان عانا ەمەس، قىتايدان دا ارتتا قالىپ كەلەدى.
يۋري بوريسوۆ 2022 جىلدىڭ شىلدەسىندە "روسكوسموس" باسشىسى بولىپ تاعايىندالعانعا دەيىن رەسەي ۇكىمەتىندە ۆيتسە-پرەمەر قىزمەتىن اتقارىپ، اسكەري-ونەركاسىپتىك كەشەندى باسقارعان. ونىڭ نەگىزگى جەتىستىگى – "انگارا-ا5" اۋىر زىمىران تاسىعىشىنىڭ "ۆوستوچنىي" عارىش ايلاعىنان العاشقى سىناق ۇشىرىلۋىن ۇيىمداستىرۋ بولدى. بۇل كەڭەس وداعى ىدىراعاننان كەيىن تولىعىمەن جاڭادان جاسالعان العاشقى رەسەيلىك زىمىران. الايدا، بوريسوۆتىڭ باسشىلىعىنداعى ماڭىزدى ساتسىزدىك – "لۋنا-25" جوباسى. رەسەيدىڭ 1976 جىلدان كەيىنگى العاشقى اي بەتىنە قونۋ كەزىندە اپاتقا ۇشىرادى.
31 جەلتوقساندا پۋتين بوريسوۆقا 2030 جىلعا دەيىنگى جانە 2036 جىلعا دەيىنگى كەلەشەككە ارنالعان رەسەيدىڭ عارىش سالاسىن دامىتۋ جونىندەگى ۇلتتىق جوبانى ازىرلەۋدى تاپسىردى. جوبا 2025 جىلدىڭ 1 مامىرىنا دەيىن دايىن بولۋى كەرەك. ەندى جاڭا باسشى دميتري باكانوۆ قىسقا مەرزىم ىشىندە كورپوراتسيانىڭ ءىسىن تولىق يگەرۋى ءتيىس.
ايتا كەتۋ كەرەك، باكانوۆ بۇعان دەيىن رەسەيدىڭ عارىش سالاسىندا جۇمىس ىستەگەن. 2010 جىلدارى ول "روسكوسموس" قۇرامىنداعى "گونەتس" سپۋتنيكتىك بايلانىس جۇيەسىنە جاۋاپتى ەنشىلەس كاسىپورىندى باسقارعان.
