TikTok پلاتفورماسى قازاقستان بيلىگىنىڭ وتىنىشىنەن كەيىن «يوۋ، ورىستار» ءانىن ءوشىردى. بۇل تۋرالى قازاقستاننىڭ مادەنيەت جانە اقپارات ۆيتسە-ءمينيسترى ەۆگەني كوچەتوۆ تاسس اگەنتتىگىنە مالىمدەدى، دەپ حابارلايدى "ادىرنا" ۇلتتىق پورتالى.
مينيسترلىك ءاندى ءوشىرۋ تۋرالى سۇرانىستى بىرنەشە ينتەرنەت-رەسۋرس پەن ونلاين-پلاتفورما اكىمشىلىگىنە جىبەرگەن. 2025 جىلعى 27 قاڭتارداعى جاعداي بويىنشا TikTok بۇل ءوتىنىشتى ورىنداپ، زاڭعا قايشى دەپ تانىلعان كونتەنتتى پلاتفورماسىنان الىپ تاستادى.
كوچەتوۆتىڭ ايتۋىنشا، بۇل ءان جانە ونىڭ ۇزىندىلەرى 22 شەتەلدىك ينتەرنەت-رەسۋرستا انىقتالعان.
بارلىق انىقتالعان ماتەريال بويىنشا پلاتفورمالارعا زاڭ بۇزۋشىلىقتاردى جويۋ تۋرالى حابارلامالار جىبەرىلگەن.
قر باس پروكۋراتۋراسى 29 قاڭتاردا ءاننىڭ اۆتورى ءالى انىقتالماعانىن مالىمدەدى. الەۋمەتتىك جەلىدە جاريالانعان ترەككە بايلانىستى تەمىرلان ەڭسەبەككە قاتىستى قر قىلمىستىق كودەكسىنىڭ 174-بابى بويىنشا ءىس قوزعالدى.
الماتى پوليتسياسى بۇعان دەيىن QazNews24 ساتيرالىق پابليگىنىڭ اۆتورى تەمىرلان ەڭسەبەككە قاتىستى قوزعالعان ءىستىڭ ونىڭ باسقا جازبالارىنا قاتىسى جوق ەكەنىن ايتقان.
