ىشىندە 10 جولاۋشىسى بار ۇشاق بەيسەنبى كۇنى اركتيكالىق شەڭبەردىڭ وڭتۇستىگىندەگى الياسكاداعى نورتون ساۋند ارقىلى ۇشىپ بارا جاتقاندا جوعالىپ كەتتى. بۇل تۋرالى "امەريكا داۋىسى" راديوسى مالىمەت تاراتتى، دەپ حابارلايدى “ادىرنا” ۇلتتىق پورتالى.
الياسكا قوعامدىق قاۋىپسىزدىك دەپارتامەنتىنىڭ حابارلاۋىنشا، Bering Air ۇشاعى ۋنالاكلەتتەن نومعا باعىت العان. بورتتا توعىز جولاۋشى مەن ۇشقىش بولعان. بيلىك ونىڭ سوڭعى بەلگىلى كوورديناتتارىن انىقتاۋعا تىرىسۋدا.
ۋنالاكليت — الياسكاداعى باتىس بولىگىندە ورنالاسقان ەلدى مەكەن، نومنان وڭتۇستىك-شىعىسقا قاراي 240 شاقىرىمدا جانە انكوريدجدەن سولتۇستىك-باتىسقا قاراي 640 شاقىرىمدا ورنالاسقان. وندا شامامەن 690 ادام تۇرادى.
بۇل - سوڭعى بىرنەشە كۇندە اقش-تا بولعان ءۇشىنشى ءىرى اۆياتسيالىق وقيعا. 29 قاڭتاردا ەل استاناسى ماڭىندا جولاۋشىلار ۇشاعى مەن ارميالىق تىكۇشاق سوقتىعىسىپ، 67 ادام قازا تاپتى. ەكى كۇننەن كەيىن، 31 قاڭتاردا فيلادەلفيادا مەديتسينالىق تاسىمالداۋشى ۇشاق اپاتقا ۇشىراپ، ونىڭ بورتىندا التى ادام مەن جەردە ءبىر ادام قازا تاپتى.
Bering Air اۆياكومپانياسىنىڭ پايدالانۋ جونىندەگى ديرەكتورى دەۆيد ولسوننىڭ ايتۋىنشا، Cessna Caravan ۇشاعى ۋنالاكليتتەن 14:37-دە ۇشىپ شىققان، جانە ءبىر ساعاتتان از ۋاقىت ىشىندە بايلانىس ۇزىلگەن. اقش قۇتقارۋ قىزمەتىنىڭ مالىمەتىنە سايكەس، ۇشاق جاعالاۋدان 19 شاقىرىم قاشىقتىقتا بولعان.
Bering Air اۆياكومپانياسى الياسكا باتىسىنداعى 32 ەلدى مەكەندى ءوز حابتارىنان — نوم، كوتسەبۋ جانە ۋنالاكليتتەن — قىزمەت كورسەتەدى. كوپتەگەن باعىتتار اپتاسىنا ەكى رەت، دۇيسەنبىدەن سەنبىگە دەيىن، تۇراقتى رەيستەرمەن ورىندالادى.
اسىرەسە، قىس مەزگىلىندە ۇشاقتار كوبىنەسە الياسكانىڭ شالعاي اۋداندارىندا ۇلكەن قاشىقتىقتاردى ەڭسەرۋدىڭ جالعىز جولى بولىپ سانالادى.
نوم قالاسىنىڭ ءورت قىزمەتى الەۋمەتتىك جەلىلەردە جەردەگى توپتار نومنان توپكوكقا دەيىنگى جاعالاۋدا ىزدەستىرۋ جۇمىستارىن جۇرگىزىپ جاتقانىن حابارلادى.
«اۋا رايىنان اۋە ىزدەۋلەرىن جۇرگىزۋگە مۇمكىندىك شەكتەۋلى»، — دەلىنگەن حابارلامادا.
تۇرعىندارعا وزدىگىنەن ىزدەۋ توپتارىن ۇيىمداستىرماۋ ۇسىنىلدى، سەبەبى اۋا رايى تىم قاۋىپتى.
ۇشاق شىققان كەزدە ۋنالاكليتتە تەمپەراتۋرا -8,3°C بولعان. قار جاۋىپ، تۇمان بايقالعان.
ۇشاقتا بولعان ادامداردىڭ ەسىمدەرى ازىرگە جاريالانبادى.
