ۋكراينا اقش-تىڭ جوعارى لاۋازىمدى وكىلدەرىمەن كەلىسسوزدەردەن كەيىن كاسپي قۇبىر كونسورتسيۋمىنىڭ (كقك) ينفراقۇرىلىمىنا شابۋىل جاساماۋعا مىندەتتەمە الدى، دەپ حابارلايدى "ادىرنا" ۇلتتىق پورتالى.
بۇل تۋرالى Bloomberg اگەنتتىگى اقپارات تاراتتى.
اقپاراتقا سايكەس، كيەۆ قارا تەڭىزدەگى رەسەيگە قاتىسى جوق مۇناي تانكەرلەرىنە دە شابۋىل جاساماۋعا كەلىسكەن. الايدا بۇل ءۇشىن بىرنەشە شارت قويىلعان. اتاپ ايتقاندا، كەمە مەن ونىڭ يەسى ۋكراينا سانكتسيالارىنىڭ تىزىمىندە بولماۋى، رەسەي ازاماتىنا نەمەسە زاڭدى تۇلعاسىنا تيەسىلى بولماۋى ءتيىس. سونىمەن قاتار تانكەر بورتىندا رەسەي مۇنايى نەمەسە وسى ەلدەن شىققان وزگە دە جۇك بولماۋى قاجەت.
Bloomberg مالىمەتىنشە، كوممەرتسيالىق تاسىمالداۋشىلار ءۇشىن ۋكراينا ارنايى بايلانىس ارنالارى مەن ءتيىستى نۇسقاۋلىقتار ازىرلەگەن. بۇل كەلىسسوزدەر شىلدە ايىندا نوۆوروسسيسك ماڭىندا بولعان بىرنەشە درون شابۋىلىنان كەيىن وتكەن. اتالعان شابۋىلدار مۇناي تيەۋ جۇمىستارىنىڭ ۋاقىتشا توقتاۋىنا جانە الەمدىك نارىقتاعى مۇناي باعاسىنىڭ وسۋىنە اسەر ەتكەن.
قازاقستان ءۇشىن كقك مۇناي ەكسپورتىنداعى نەگىزگى باعىتتاردىڭ ءبىرى سانالادى. كاسپي قۇبىر كونسورتسيۋمى ارقىلى ەلدەگى مۇناي ەكسپورتىنىڭ 80 پايىزدان استامى تاسىمالدانادى. ونىڭ ىشىندە تەڭىز، قاشاعان جانە قاراشىعاناق كەن ورىندارىنان وندىرىلەتىن مۇناي بار. 19 شىلدەدە كقك تەڭىز تەرمينالىندا مۇناي تيەۋ كەزىندە ليبەريا جانە مارشالل ارالدارى تۋىن كوتەرگەن ASIA جانە NISSOS IOS تانكەرلەرىنە دروندار شابۋىل جاساعان. ASIA تانكەرىندە ءورت شىعىپ، ونى كقك اۆاريالىق-قۇتقارۋ قىزمەتتەرىمەن بىرلەسىپ ەكيپاج سوندىرگەن. وسىدان كەيىن مۇناي تيەۋ جۇمىستارى ۋاقىتشا توقتاتىلدى. 20 شىلدەگە قاراعان ءتۇنى مۇناي تيەپ تۇرعان Nelsa تانكەرىنە دە درون شابۋىل جاساعان. درون كەمەنىڭ ارتقى بولىگىنە سوعىلىپ، پالۋبا مەن جۇك بولىمدەرىندە ءورت شىققان. ءورت بىرنەشە ساعاتتان كەيىن ءسوندىرىلدى. تانكەردىڭ ءجۇزۋ قابىلەتى ساقتالىپ، مۇناي توگىلگەن جوق. 30 شىلدەگە قاراعان ءتۇنى كقك تەڭىز تەرمينالىنا تاعى دا دروندار شابۋىل جاساعان. بۇل جولى مارشالل ارالدارى تۋىن كوتەرگەن Nissos Sifnos تانكەرى زاقىمداندى. كەمە «تەڭىزشەۆرويل» جشس-ءنىڭ مۇنايىن تيەپ جاتقان. شابۋىلدان كەيىن جۇك پالۋباسىندا ءورت شىعىپ، ەكيپاج ءۇش كومەكشى كەمەنىڭ قاتىسۋىمەن ونى سوندىرگەن. مۇنايدىڭ تەڭىزگە توگىلۋىنە جول بەرىلمەدى.
Reuters اگەنتتىگىنىڭ مالىمەتىنشە، درون شابۋىلدارىنىڭ جيىلەۋىنە بايلانىستى قازاقستان مۇنايىنىڭ كقك ارقىلى ەكسپورتى شىلدە ايىندا جوسپارلى كورسەتكىشتەن 20 پايىزدان استام تومەندەگەن.
