Aqtóbe oblysynda kópten kútken baspanasyna qol jetkizgen turǵyndar onyń sapasy men qunyna shaǵymdanýda, dep habarlaıdy "Adyrna" ulttyq portaly KTK- ǵa siltep.
Bul úıler balalar úıiniń tárbıelenýshilerine, jalǵyzbasty analarǵa jáne erekshe qajettiligi bar balalardy tárbıelep otyrǵan otbasylarǵa berilgen. Alaıda, turǵyndardyń aıtýynsha, jańa úılerdiń qubyrlarynan sý ketip, tóbeden jel soǵyp, jaryq turaqty janbaıdy.
Turǵyndardyń aıtýynsha, uzaq kútken baspananyń quny da qymbat. Nına Shalpakova 15 jasynda memlekettik turǵyn úı kezegine turǵan. 35 jasynda ol Mártók aýdanynan jalǵa beriletin páterdiń kiltin aldy. Bastapqyda qýanyshy qoınyna syımaǵan ol, keıin úıdiń baǵasyn bilgende kóńili qalǵan.
"Úı alatynyma múlde senbedim. Bul habardy estigende qatty qýandym. Biraq keıin sharttardy bilgende, "óte qymbat" dedim. 21 mıllıon teńge! Bul múlde durys emes", – dedi Mártók kentiniń turǵyny Nına Shalpakova.
Jańa ǵımarattaǵy páterlerdiń kilti 22 qańtarda 38 otbasyǵa tabystaldy. Alaıda jańa qonystanýshylar kelisimshartty kórmegen. Onyń ústine úılerdiń sapasy kóńil kónshitpeıdi. Turǵyndar mundaı turǵyn úı úshin aı saıyn 20 myń teńge tóleý jáne kommýnaldyq qyzmetterge qarajat jumsaý tym qymbat ekenin aıtady.
"Bizge eshqandaı qujat berilmedi. Kelip kiltti alyp ketińizder dep shaqyrdy. Quny da, eshteńesi de aıtylmady. Munda jaryq janbaıdy. Tóbeden jel soǵady. Túnde uıyqtaý múmkin emes. Mundaı úıdi 21 mıllıon teńgege baǵalaý artyq", – dedi taǵy bir turǵyn Anastasııa ymbal.
Turǵyndardyń aıtýynsha, bul jalǵa beriletin úılerdiń qurylysy tórt jyl buryn bastalǵan. Irgetasy quıylyp, qabyrǵalary kóterilgen soń, jumystar aıaqsyz qalǵan. Qańtar aıynda ǵana alǵashqy qonystanýshylar kóship kelgen.
Qurylys materıaldarynyń qymbattaýyna baılanysty qurylys jumystary keıinge qaldyrylǵan. Bul turǵyn úılerdiń túpkilikti baǵasyna áser etken. Aýdan ákimdigi turǵyn úılerdiń jalǵa alý quny qolaıly dep esepteıtinin aıtady.
"Baǵasy qolaıly, óıtkeni Mártóktegi jaldamaly úılerdiń naryqtyq baǵasy aıyna 30-50 myń teńge aralyǵynda. Al qurylys sapasy boıynsha shaǵymdar túspedi", – dedi Mártók aýdany ákiminiń orynbasary Aslan Aıtmaǵambetov.
