اقش بيلىگى العاشقى زاڭسىز ميگرانتتار توبىن گۋانتانامو تۇرمەسىنە جونەلتتى، دەپ حابارلايدى "ادىرنا" ۇلتتىق پورتالى.
جەتكىزىلگەندەردىڭ اراسىندا اسا قاۋىپتى قىلمىسكەرلەر بار. سونىڭ ىشىندە ۆەنەسۋەلانىڭ Tren de Aragua قىلمىستىق ۇيىمىنىڭ 10 مۇشەسى دە قامتىلعان. ولار ادام ۇرلاۋ جانە ادام ساۋداسىمەن اينالىسقانى ءۇشىن ۇستالعان.
اق ءۇيدىڭ ءباسپاسوز حاتشىسى كەرولاين لەۆيتتىڭ ايتۋىنشا، ولار ارنايى ۇشاقپەن اسكەري بازاعا جەتكىزىلگەن. جاقىن كۇندەرى قوسىمشا رەيستەر ۇيىمداستىرۋ جوسپارلانىپ وتىر.
قازاقستاننىڭ سىرتقى ىستەر ۆيتسە-ءمينيسترى ەرمۇحامبەت قونىسپاەۆ اقش شەكاراسىنداعى زاڭسىز ميگرانتتارعا ارنالعان لاگەرلەردە قازاقستاندىقتار جوق ەكەنىن مالىمدەدى.
ەسكە سالا كەتەيىك، بۇعان دەيىن اقش پرەزيدەنتى دونالد ترامپ 30 مىڭنان استام زاڭسىز ميگرانتتى گۋانتانامو تۇرمەسىنە كوشىرۋ تۋرالى جارلىققا قول قويعان بولاتىن. كۋبادا ورنالاسقان بۇل كولونيا قاتاڭ ۇستاۋ رەجيمىمەن ەرەكشەلەنەدى.
"لاگەرلەردە قازاقستان ازاماتتارى جوق. جاقىندا ءبىزدىڭ ەلشىلىك وسى ماسەلە بويىنشا شارالار قابىلداناتىنىن حابارلادى. زاڭسىز جۇرگەن ازاماتتارعا بۇل جاعدايدى رەتتەۋ قاجەتتىگى تۋرالى ەسكەرتۋ جاسالدى. ستاتيستيكا بويىنشا ناقتى سانىن ايتا المايمىن. بىراق ولاردىڭ بارلىعىنا ەسكەرتۋ جىبەرىلدى", – دەدى قونىسپاەۆ.
ۆيتسە-ءمينيستردىڭ ايتۋىنشا، قازاقستاننىڭ ۆاشينگتونداعى ەلشىلىگى مەن باسقا دا كونسۋلدىق مەكەمەلەرى اقش-تا جۇرگەن ازاماتتاردى تۇراقتى تۇردە باقىلاپ وتىرادى.
