"ولار ماعان جۇماققا جىلدام بارۋعا بولاتىنىن ايتتى"

2051

اكەسىنەن بالا كۇنىندە تىرىدەي ايىرىلىپ، ال اناسى تاراز قالاسىندا بەلگىسىز بىرەۋلەردىڭ قولىنان قاپىدا كوز جۇمىپ، قامقورشىسىز قالعان جەتكىنشەك ورال قالاسىندا تۇراتىن تۋىسىن پانالاۋعا دۋشار بولىپتى. تاعدىرى نەبارى 18 جاسىندا تەمىر تورمەن تابىسقان سابيت ەسىمدى جاس جىگىت ءوزىنىڭ باسىنان كەشكەن وقيعالارىن وسىلاي بايانداپ باستادى.

ول بۇگىندە وسكەمەن قالاسىنداعى تۇزەتۋ كولونياسىنىڭ بىرىندە جازاسىن وتەپ جاتىر. موينىنا تاعىلعان ايىپ تا جەڭىل ەمەس. الەۋمەتتىك جەلىدە ەكسترەميزم مەن تەرروريزمدى ناسيحاتتاعانى ءۇشىن قر قىلمىستىق كودەكسىنىڭ 256- بابىنىڭ 2-تارماعى، 174-باپتىڭ 1-تارماعى بويىنشا ءۇشىن جەتى جىل مەرزىمگە باس بوستاندىعىنان ايىرىلعان.

-سابيت، بىزگە ءوز ءومىربايانىڭ تۋرالى ايتىپ بەرشى، دىنگە قالاي بەت بۇردىڭ، نە تۇرتكى بولدى؟

-انام قايتىس بولعان سوڭ، تۋىسىمىزدىڭ ۇيىندە ءومىر ءسۇرۋ مۇمكىن بولمادى. كۇندە ۇرىس ەستىگەننەن شارشادىم. ول كىسىگە مەنى بالالار ۇيىنە وتكىزىپ تاستاۋىن ءوتىندىم. يسلامعا قىزىعۋشىلىعىم سول ينتەرناتتا باستالدى. ويتكەنى باسىما قيىنشىلىقتار بولدى. ومىردە ءبىر نارسەگە سۇيەنگىم كەلدى. وزىمە كومەكتەسەتىن بەلگىسىز ءبىر كۇش دەگەن سياقتى عوي.... سول نارسەنى ىزدەدىم. مەن سوندا نە ءۇشىن ومىرگە كەلدىم، نە ىستەۋ كەرەكپىن، نەگە مەنىڭ ءومىرىم وسىنداي، باسقالار قالاي ءومىر سۇرەدى دەگەن سياقتى سۇراقتار پايدا بولدى. اكەسىمەن بىرگە مەشىتكە بارىپ، ناماز وقىپ جۇرەتىن ەرالى ەسىمدى كلاستاس دوسىم بولدى. ناماز وقۋدى ەڭ العاش سودان سۇراپ ۇيرەندىم. بىراق كەيىننەن مەنىڭ دىنگە دەگەن قىزىعۋشىلىعىم ارتىپ، ينتەرنەت ارقىلى ءارتۇرلى ۋاعىزداردى ىزدەپ ءجۇرىپ تىڭداي باستادىم. مەشىتكە ءجيى بارىپ، ءبىزدىڭ بالالار ءۇيىنىڭ بۇرىڭعى بالالارمەن كەزدەسىپ ءجۇردىم. ءبىر كۇنى ولار ماعان نامازدى قاتە وقىپ جۇرگەنىمدى، اقيدامنىڭ قاتە ەكەنىن ايتىپ، دالەلدەر كەلتىردى. مەنىڭ ساۋاتىم بولمادى، ءدال وسى كەزدەن باستاپ شاتىسا باستاپپىن...

ءسابيتتىڭ ايتۋىنشا ول پسەۆدوسالافيلەردىڭ ىقپالىنا تۇسكەن سوڭ، وعان العاش ناماز وقىپ ۇيرەتكەن ەرالى دەگەن دوسى ونىمەن بايلانىسىن بىردەن ءۇزىپتى. اكەسى وعان سابيتپەن ارالاسۋىنا قاتاڭ تىيىم سالعان ەكەن.

-كىمدەردىڭ ۋاعىزدارىن تىڭدادىڭ، ولار ساعان نە ۇيرەتتى؟

-ەڭ باسىندا ديلمۋرات، نازراتۋللا، رينات دەگەن ادامداردىڭ ۋاعىزدارىن تىڭدادىق. ولار ءوز ۋاعىزدارىندا ابۋ-حانيفا ماسحابىن ۇستاناتىندارمەن ءوزىڭ ءبىرىنشى بولىپ امانداسپاۋ كەرەك، ەگەر وزدەرى امانداسسا قىسقا عانا جاۋاپ قايتارۋ كەرەك دەپ ۇيرەتەتىن. ءتىپتى دوسىم ەرالىمەن كەزدەسكەندە دە سولار ايتقانداي امانداسىپ ءجۇردىم. اقىرى ارامىز مۇلدە سۋىپ، كەيىن مۇلدە امانداسپايتىن بولدىق. ءبىز ولاردى سىرتىنان «بيداعاتشىلار» دەپ ايتاتىنبىز. جانىمدا جۇرگەن جاماعاتتاعى بالالاردىڭ كوپشىلىگى وسى جەتىمدەر ءۇيىنىڭ بۇرىڭعى تۇلەكتەرى، اراسىندا تۇرمەدەن بوساپ شىققان جىگىتتەر دە بولدى. ولارمەن بىرگە ساقال ءوسىرۋ، شالباردىڭ بالاعىن قىسقارتۋ، تەلەۆيزور كورمەۋ قاجەت، يمامدارمەن سويلەسپەۋ، ماسحاب ۇستاناتىندارمەن ارالاسپاۋ كەرەك، «كاپىرلەردىڭ مەرەكەلەرىن» تويلاماۋ كەرەك، مۋزىكا تىڭداماۋ، كىتاپ وقىماۋ كەرەك دەگەن سياقتى «زاپرەتتاردىڭ» ءبارىن ىستەدىم. بۇنىڭ بارلىعىن «تازا يسلام» دەپ ويلايتىنمىن. ال ناماز وقىمايتىن ادامداردى، پوليتسيا قىزمەتكەرلەرىن ءتىپتى جەك كورىپ كەتتىم.

-سوندا «كاپىرلەردىڭ مەرەكەلەرى» دەگەنىڭ قانداي مەرەكەلەر ەدى؟

-بىزگە يسلامدا جوق مەرەكەلەردىڭ بارلىعىن «كاپىرلەردىڭ مەرەكەلەرى» دەپ ۇيرەتتى عوي.... جاڭا جىل، اياز اتا، ناۋرىز، 9-ماي، تۋعان كۇن دەگەن سياقتىلار عوي.. ءتىپتى پايعامبىرىمىز مۇحاممەد س.ع.س-نىڭ تۋعان كۇنى «ءماۋلىت مەرەكەسىن» تويلاپ جاتقانداردى دا جەك كورەتىنبىز.. اللا كەشىرسىن مەنى......

-ال سيرياداعى سوعىسقا كەتۋ تۋرالى شەشىم قالاي پايدا بولدى؟

-ءبىزدىڭ ارامىزدا فيتنا ء(وزارا كەلىسپەۋشىلىكتەر) پايدا بولا باستادى. كەيبىر جىگىتتەر ديلمۋرات پەن نازراتۋللانىڭ ۋاعىزدارىنىڭ ءالسىز ەكەندىگىن، ال ينتەرنەتتە ناعىز يسلامدى ۋاعىزدايتىن شەتەلدىك مىقتى شەيحتاردىڭ بار ەكەنىن ايتىپ ءجۇردى. سيريادا مۇسىلمانداردىڭ مەملەكەتى قۇرىلعالى جاتقانى، جەر بەتىندەگى بارلىق مۇسىلمانداردىڭ باسىن قوسىپ، يسلام حاليفاتىن قۇراتىنى تۋرالى بەينەروليكتەر كوردىك. سول ۋاقىتتان باستالدى عوي.... يسلام حاليفاتى تۋرالى، سيريادا سوعىسىپ جۇرگەن مۇسىلماندار تۋرالى ۆيدەولاردى ءجيى كورە باستادىم. سيرياعا حيجرا جاساپ كەتىپ، كوتتەدج ۇيلەردە، باقىتتى ءومىر ءسۇرىپ جاتقان قازاقتار تۋرالى ۆيدەولار تاراپ جاتتى. بۇلاردىڭ ادامداردى تارتۋ ءۇشىن ارنايى ارنايى تۇسىرىلگەنىن كەيىن ءبىلدىم عوي...

-ياعني سەن پسەۆدوسالافيلىك يدەولوگيانىڭ ءوز ىشىندەگى اعىمدارىنا اۋىسىپ كەتتىڭ عوي..

-يا، مەن ەندى بۇرىن تىڭداپ كەلگەن ءدىلمۇرات، نازراتۋللا، باشپاەۆ دەگەندەردىڭ ۋاعىزدارىن تىڭداۋدى قويىپ، سيرياعا حيجرا جاساۋدى اشىق شاقىراتىن ۆيدەو-ۋاعىزداردى كورە باستادىم. ولار ءوز ۋاعىزدارىندا دجيحات جاساۋ ارقىلى جۇماققا جىلدام بارۋعا بولاتىنىن ايتاتىن. قازىر ويلانسام سول ءدىلمۇرات، نازراتۋللا، رينات دەگەندەر ەڭ ءبىرىنشى اقيداڭدى وزگەرتىپ، ادامداردان الىستادى ەكەن. ءبىراز ۋاقىتتان كەيىن ادام ءوزىڭ ويلانا باستايسىڭ.... اناۋ كافير، مىناۋ كافير... ءوزىڭدى سونداي ويعا اكەلەدى. ياعني وزدەرى باستاپ اداستىرىپ، كەيىننەن دجيحاتشىلارعا قاراي وتكىزىپ جىبەرەتىن كوپىر سياقتى...

-سابيت، سوندا ولاردىڭ ءبىزدىڭ زايىرلى مەملەكەتتى جەك كورۋدىڭ نەگىزگى سەبەبى نەدەن دەپ ويلايسىڭ؟

-ولار جەر بەتىندەگى مەملەكەتتەر اللانىڭ زاڭىنا عانا باعىنۋ كەرەك دەپ سانايتىن. ال باسقا زاڭداردى ادامداردىڭ وزدەرى ويلاپ تاپقان زاڭدار، وعان باعىنعاندار كاپىر بولادى دەپ ۇيرەتەدى عوي...

-ارى قاراي تاعى قانداي ارەكەتتەر جاسادىڭ؟

-مەن سيرياعا شاقىراتىن ۋاعىزداردى جيناقتاپ، ولاردى تاراتا باستادىم. ۇقك-ءنىڭ قىزمەتكەرلەرى ماعان تەولوگتاردى ەرتىپ اكەلىپ ءتۇسىندىردى. ولار ماعان ءتۇسىندىرىپ باستاعاندا، جۇرەگىمە شۋبحا (كۇمان) سالماسىن دەپ ىشىمنەن بىلەتىن دۇعالاردى وقىپ، مەلشيىپ وتىرا بەرەتىنمىن. مەنىڭ قايتپايتىنىمدى تۇسىنگەن كنب قىزمەتكەرلەرى مەنى تۇرمەگە ەرتىپ اپارىپ، ەكسترەميزم مەن تەرروريزم ءۇشىن سوتتالعان ادامدارمەن دە كەزدەستىردى. سوتتالعانداردىڭ ءبىرى ءوزىنىڭ سيرياعا بارىپ كەلگەنىن، ول جاقتا ءبىز ويلاعانداي ەشقانداي دا يسلام جوق ەكەندىگىن، بوسقا الدانعانىن ايتىپ، مەنى ول جاققا بارماۋعا ۇگىتتەدى. بىراق مەن ونىڭ سوزدەرىنە سەنبەدىم. تۇرمەدە ونى كوندىرىپ، ماعان ادەيى ايتقىزىپ وتىرعان شىعار دەپ ويلادىم. ءتىپتى وعان اللانىڭ ءدىنى ءۇشىن قيىندىقتارعا شىداماعان قورقاق-مۋنافيقسىڭ دەپ كىنالاپ كەتتىم. بۇل مەنىڭ ۇلكەن قاتەلىگىم بولدى.

-ياعني وزىڭە دۇرىس جول كورسەتپەك بولعان ادامداردى تىڭدامادىم دەيسىڭ عوي...

-يا، ويتكەنى مەن جەتىم بولدىم عوي. بۇل جەردە مەنى ۇستاپ تۇرعان ەشكىم بولعان جوق. اكەم جوق، شەشەم دە جوق، جاقىن دوستارىم دا بولمادى. اينالام تولعان كافيرلار دەپ سانادىم... قالايدا سيرياعا كەتۋدىڭ جولىن ىزدەدىم. ءوزىمنىڭ وڭباي قاتەلەسكەنىمدى تۇرمەگە تۇسكەن كەزدە بىراق ءتۇسىندىم عوي. شىنىمدى ايتسام ۋاعىزدار ميىمدى مۇلدە ويلاندىرماي، قاتىرىپ تاستاعان عوي. كوزدەرىم ودان باسقا ەشتەڭەنى كورمەي، قۇلاعىم دۇرىس اقىلدى ەستىمەي، ميىم ەشتەمەنى قابىلداماي قالعان. تۇرمەدە ءوزىم سياقتى ادامداردى كەزدەستىردىم. قازىر ولاردىڭ تاعدىرلارى تۋرالى وزدەرىنەن سۇراپ، جيناقتاپ، اڭگىمە سياقتى جازىپ ءجۇرمىن. ءبارىنىڭ وقيعالارى وتە ۇقساس.... مەن سياقتى يسلامداعى شىندىقتى ىزدەيمىن دەپ ءجۇرىپ شاتىسىپ كەتكەندەر عوي ءبارى....

-سابيت، شىنىڭدى ايتشى، قازىر قانداي شەشىمگە كەلدىڭ، الدىڭدا قويعان قانداي ماقساتىڭ بار؟

-قازىر مەن تۋرا جولعا تۇسىرگەن اللاعا شۇكىر ەتەمىن. اللانىڭ اتىمەن انت ەتەيىن. شىن ءسوزىم. مىندا دۇرىس ءدىني كىتاپتاردى وقىپ، تەولوگ-عالىمدارمەن كەزدەستىم. سيريانى كوزىمەن كورىپ كەلگەن ەكى جىگىتتىڭ اڭگىمەلەرىن تىڭدادىم. وسىلايشا ءوزىمنىڭ قاي جەردەن قاتەلەسكەنىمدى ۇقتىم. مەنىڭ وسى سوزدەرىمدى وقىپ وتىرعان، ءالى تەرىس اعىمدا جۇرگەن باۋىرلارىما ايتقىم كەلەدى. سالافيزم دەگەننىڭ قايسىسى بولسا دا دۇرىس جول ەمەس. ءوزىڭىز كورىپ تۇرسىز عوي، ماعان بۇل سوزدەردى ايتۋعا بۇل جەردە ەشكىم قىسىم جاساپ تۇرعان جوق. تەك ءبىلىمدى ادامداردى تىڭداپ، دۇرىس كىتاپتاردى وقىپ، وسىنداي شەشىم قابىلدادىم. وسىنى ءتۇسىنۋ ءۇشىن مىندەتتى تۇردە سوتتالىپ، نەمەسە مەنىڭ تاعدىرىمدى قايتالاۋ قاجەت ەمەس. بوستاندىقتا ءبىلىم الۋعا مۇمكىندىك زور عوي. ءبىلىمدى ادامداردى تىڭداۋ كەرەك، اينالاڭداعى جاقىن ادامداردى جاقسى كورۋگە كەرەك. تۇرمەدەن شىققان سوڭ وقۋعا ءتۇسىپ، تەولوگ-ءدىنتانۋشى بولعىم كەلەدى. كەزىندەگى ءوزىم سياقتى اداسىپ جۇرگەن جاستارمەن ءتۇسىندىرۋ جۇمىستارىن جۇرگىزگىم كەلەدى. مەن ولارعا تۇسىندىرە الامىن دەپ ويلايمىن، ويتكەنى ءبارىن ءوز باسىمنان وتكىزدىم عوي،-دەپ سابيت اڭگىمەسىن اياقتادى.

اقيداسىنىڭ اقىرى اداسۋشىلىققا اپارعان جاس جىگىتتىڭ تاعدىرىنا جانىمىز اشىسا دا، ءوز قاتەلىگىن ءتۇسىنىپ، بىزگە بار سىرىن اشىق ايتىپ، الدىنا ۇلكەن ماقسات قويا بىلگەن زور ىنتاسىنا ريزا بولىپ اتتاندىق.

اڭگىمەلەسكەن: ەرمەك قۇرمانعاليەۆ. شقو ءدىن ماسەلەلەرىن زەرتتەۋ ورتالىعىنىڭ مامانى.

"ادىرنا" ۇلتتىق پورتالى

پىكىرلەر