يسمايليت-نيزاريتتەردىڭ رۋحاني جەتەكشىسى، اعا حان دامۋ جەلىسىنىڭ (AKDN) نەگىزىن قالاۋشى، حانزادا كاريم اعا حان IV ليسسابوندا 88 جاسىندا ومىردەن ءوتتى، دەپ حابارلايدى "ادىرنا" ۇلتتىق پورتالى 24.kg-عا سىلتەمە جاساپ.
بۇل تۋرالى Ismaili Imamat Diwan مەكەمەسى رەسمي مالىمدەدى.
اعا حان IV يسمايليت قاۋىمىن 1957 جىلدان بەرى باسقاردى. ول بۇل قىزمەتكە 20 جاسىندا، ءوز اتاسىنىڭ ورنىنا كەلگەن.
داستۇرگە سايكەس، جاڭا يمامدى ونىڭ الدىنداعى جەتەكشى وسيەت ارقىلى بەلگىلەيدى. جاقىن كۇندەرى كاريم اعا حاننىڭ وسيەتى جاريالانعاننان كەيىن جاڭا يمامنىڭ ەسىمى بەلگىلى بولادى دەپ كۇتىلۋدە.
قىرعىزستاندا اعا حان قورى (AKF) 2002 جىلدان بەرى بەلسەندى جۇمىس ىستەپ كەلەدى. قور ءبىلىم بەرۋ، دەنساۋلىق ساقتاۋ جانە اۋىلدىق ايماقتاردى دامىتۋ سالالارىندا ءتۇرلى جوبالاردى جۇزەگە اسىرادى.
2000 جىلى تاجىكستان، قىرعىزستان جانە قازاقستان پرەزيدەنتتەرى يسمايليت-نيزاريتتەردىڭ رۋحاني جەتەكشىسىمەن بىرگە ورتالىق ازيادا بەدەلدى ۋنيۆەرسيتەت (واۋ) سالۋ تۋرالى كەلىسىمگە كەلدى. ونىڭ ءبىر كامپۋسى جەتىسۋ وبلىسىنداعى تەكەلى وڭىرىندە بوي كوتەرۋى ءتيىس ەدى. الايدا، قازاقستان ءالى كۇنگە دەيىن بۇل كەلىسىمدى ورىنداعان جوق.
بۇل ماسەلەدە بىرنەشە قاراما-قايشى ۇستانىم بار. كەلىسىمنىڭ كەشىكتىرىلۋىنىڭ ىقتيمال سەبەپتەرىنىڭ ءبىرى ءدىني سالاعا قاتىستى بولۋى مۇمكىن.
