قازاقستاننىڭ كولىك مينيسترلىگى 2024 جىلعى 25 جەلتوقساندا اقتاۋ ماڭىندا اپاتقا ۇشىراعان Azerbaijan Airlines ۇشاعىنىڭ اپات سەبەپتەرى بويىنشا الدىن الا تەرگەۋ ناتيجەلەرىن جاريالادى، دەپ حابارلايدى "ادىرنا" ۇلتتىق پورتالى.
مينيسترلىك ۇشاقتىڭ گيدراۆليكالىق جۇيەلەرىنە زاقىم كەلتىرگەن بوتەن مەتالل زاتتاردىڭ كوپتەگەن تەسىكتەر قالدىرعانىن حابارلادى. قورىتىندى ەسەپ بارلىق تەرگەۋ جۇمىستارى اياقتالعان سوڭ ازىرلەنەدى.
الدىن الا ەسەپكە سايكەس، بوتەن مەتالل زاتتار قالدىرعان كوپتەگەن تەسىك بەلگىلەرى ۇشاقتىڭ قۇيرىق بولىگىنەن، تومەنگى بولىگىنەن جانە سول جاق قاناتىنان انىقتالدى. بۇل فاكتىلەر ەسەپكە قوسا تىركەلگەن فوتوسۋرەتتەردەن راستالدى.
استانا ۋاقىتىمەن 10:13:31-دە ەكيپاج العاش رەت قيىندىقتارعا تاپ بولعان. قاتتى سوققى ەستىلىپ، اۆتوپيلوت اجىراتىلعانى تۋرالى دابىل ىسكە قوسىلعان. بىرنەشە سەكۋندتان كەيىن تاعى ءبىر سوققى تىركەلگەن. مەتالل زاتتار گيدراۆليكالىق جۇيەلەردى زاقىمداپ، ناتيجەسىندە سۇيىقتىق اعىپ كەتىپ، رۋل جۇيەسىنىڭ ىستەن شىعۋىنا سەبەپ بولۋى مۇمكىن.
ءبىر مينۋتتان كەيىن كوماندير ەكيپاج مۇشەلەرىنە حابارلاسىپ: «اللو، نە بولدى؟» – دەپ سۇراعان. بورتسەرىك: «ەكى ورىندىق جارىلدى، جولاۋشىلار ورىندارىنان تۇرىپ كەتتى. ولاردى ورنىنا وتىرعىزۋعا تىرىسىپ جاتىرمىن»، – دەپ جاۋاپ بەرگەن.
وسىدان كەيىن ەكيپاج گروزنىي، روستوۆ جانە اقتاۋ اۋەجايلارىنىڭ ديسپەتچەرلەرىمەن بايلانىسقا شىققان. ەسەپتە ەكيپاجدىڭ جۇرگىزگەن كەلىسسوزدەرى ەگجەي-تەگجەيلى باياندالعان. ەكيپاج باسقارۋدى جوعالتىپ جاتقانىن حابارلاعان. الدىمەن ماحاچكالاداعى اۋا رايىن سۇراتقان. سودان كەيىن باكۋگە قايتۋ تۋرالى شەشىم قابىلداعان. رۋل ىستەن شىققانىنان كەيىن جارتى ساعات وتكەن سوڭ اقتاۋعا قونۋ تۋرالى شەشىم شىعارعان.
ەسكە سالا كەتەيىك، ۇشاق بورتىندا 67 ادام بولعان. ولاردىڭ اراسىندا ازەربايجان، رەسەي، قازاقستان جانە قىرعىزستان ازاماتتارى بار. اپات سالدارىنان 38 ادام قازا تاپتى. اقتاۋ اۋەجايىنىڭ بارلىق قۇتقارۋ قىزمەتتەرى دەرەۋ ىسكە قوسىلىپ، جولاۋشىلاردى ەۆاكۋاتسيالادى.
تەرگەۋ بارىسىندا ۇشاقتان الىنعان بوگدە زاتتار فوتوسۋرەتتەرمەن راستالدى. ۇشاق قۇرىلىمىنداعى تىك تەسىك بەلگىلەرى بوگدە نىسانداردىڭ كىرگەنىن كورسەتتى. كەيبىر زاقىمدانۋلاردىڭ ناقتى تىكبۇرىشتى پىشىندە بولۋى ەرەكشە نازار اۋدارتۋدا. قازىرگى تاڭدا كوميسسيا ۇشاقتىڭ زاقىمدانۋ ەرەكشەلىكتەرىن زەرتتەپ جاتىر. زاتتاردىڭ قايدان كەلگەنىن انىقتاۋ ءۇشىن قوسىمشا ساراپتامالار جۇرگىزىلەتىن بولادى.
