Qazaqstannyń Kólik mınıstrligi 2024 jylǵy 25 jeltoqsanda Aqtaý mańynda apatqa ushyraǵan Azerbaijan Airlines ushaǵynyń apat sebepteri boıynsha aldyn ala tergeý nátıjelerin jarııalady, dep habarlaıdy "Adyrna" ulttyq portaly.
Mınıstrlik ushaqtyń gıdravlıkalyq júıelerine zaqym keltirgen bóten metall zattardyń kóptegen tesikter qaldyrǵanyn habarlady. Qorytyndy esep barlyq tergeý jumystary aıaqtalǵan soń ázirlenedi.
Aldyn ala esepke sáıkes, bóten metall zattar qaldyrǵan kóptegen tesik belgileri ushaqtyń quıryq bóliginen, tómengi bóliginen jáne sol jaq qanatynan anyqtaldy. Bul faktiler esepke qosa tirkelgen fotosýretterden rastaldy.
Astana ýaqytymen 10:13:31-de ekıpaj alǵash ret qıyndyqtarǵa tap bolǵan. Qatty soqqy estilip, avtopılot ajyratylǵany týraly dabyl iske qosylǵan. Birneshe sekýndtan keıin taǵy bir soqqy tirkelgen. Metall zattar gıdravlıkalyq júıelerdi zaqymdap, nátıjesinde suıyqtyq aǵyp ketip, rýl júıesiniń isten shyǵýyna sebep bolýy múmkin.
Bir mınýttan keıin komandır ekıpaj múshelerine habarlasyp: «Allo, ne boldy?» – dep suraǵan. Bortserik: «Eki oryndyq jaryldy, jolaýshylar oryndarynan turyp ketti. Olardy ornyna otyrǵyzýǵa tyrysyp jatyrmyn», – dep jaýap bergen.
Osydan keıin ekıpaj Groznyı, Rostov jáne Aqtaý áýejaılarynyń dıspetcherlerimen baılanysqa shyqqan. Esepte ekıpajdyń júrgizgen kelissózderi egjeı-tegjeıli baıandalǵan. Ekıpaj basqarýdy joǵaltyp jatqanyn habarlaǵan. Aldymen Mahachkaladaǵy aýa raıyn suratqan. Sodan keıin Bakýge qaıtý týraly sheshim qabyldaǵan. Rýl isten shyqqanynan keıin jarty saǵat ótken soń Aqtaýǵa qoný týraly sheshim shyǵarǵan.
Eske sala keteıik, ushaq bortynda 67 adam bolǵan. Olardyń arasynda Azerbaıjan, Reseı, Qazaqstan jáne Qyrǵyzstan azamattary bar. Apat saldarynan 38 adam qaza tapty. Aqtaý áýejaıynyń barlyq qutqarý qyzmetteri dereý iske qosylyp, jolaýshylardy evakýaııalady.
Tergeý barysynda ushaqtan alynǵan bógde zattar fotosýrettermen rastaldy. Ushaq qurylymyndaǵy tik tesik belgileri bógde nysandardyń kirgenin kórsetti. Keıbir zaqymdanýlardyń naqty tikburyshty pishinde bolýy erekshe nazar aýdartýda. Qazirgi tańda komıssııa ushaqtyń zaqymdaný erekshelikterin zerttep jatyr. Zattardyń qaıdan kelgenin anyqtaý úshin qosymsha saraptamalar júrgiziletin bolady.
