اقش-تان ۋكرايناعا قارۋ-جاراق جەتكىزۋ قىسقا ۋاقىتقا توقتاتىلدى، بىراق وتكەن دەمالىس كۇندەرى قايتا جالعاستى. بۇل ۋاقىتشا ءۇزىلىس ترامپ اكىمشىلىگىنىڭ ۋكرايناعا قاتىستى ساياساتىن تالقىلاۋ ناتيجەسىندە بولعان. بۇل تۋرالى Reuters جازدى، دەپ حابارلايدى “ادىرنا” ۇلتتىق پورتالى.
اق ءۇي ۋكرايناعا بارلىق كومەكتى توقتاتۋ تۋرالى العاشقى شەشىمىن وزگەرتكەننەن كەيىن جەتكىزىلىم قايتا باستالدى.
اقش پرەزيدەنتى دونالد ترامپ اقپاننىڭ 3-ءى كۇنى ۋكراينا اقش-قا سيرەك كەزدەسەتىن مەتالدار جەتكىزۋگە ۋادە بەرسە، وعان كومەك جالعاساتىنىن ايتتى. بۇعان دەيىن بۇل ماسەلە ۆلاديمير زەلەنسكيدىڭ "جەڭىس جوسپارى" اياسىندا ايتىلعان بولاتىن.
"ۋكرايناعا ولاردىڭ وتە قۇندى سيرەك كەزدەسەتىن مەتالدارى بار ەكەنىن ايتىپ جاتىرمىز. ءبىز ۋكراينامەن كەلىسىم جاساۋدى قالايمىز، ونىڭ اياسىندا ولار ءبىز بەرىپ جاتقان نارسەلەردى سيرەك كەزدەسەتىن جەر مەتالدارىمەن جانە باسقا دا نارسەلەرمەن قامتاماسىز ەتەتىن بولادى", — دەدى ترامپ اق ۇيدە جۋرناليستەرگە سۇحبات بەرە وتىرىپ.
ترامپتىڭ “كيەۆتىڭ ۆاشينگتونعا رەسۋرستار جەتكىزۋى قاجەت پە” دەگەن ساۋالىنا وڭ جاۋاپ بەردى، ءارى "سيرەك كەزدەسەتىن جەر مەتالدارىنىڭ" جەتكىزىلۋىنە "كەپىلدىك العىسى كەلەتىنىن" اتاپ ءوتتى. ول ۋكراينا بۇعان دايىن دەپ مالىمدەدى. اق ءۇي باسشىسى كيەۆ "قولدانعان كومەككە" 300 ميلليارد دوللاردىڭ شاماسىندا وتەماقى تولەۋى ءتيىس ەكەنىن ايتتى.
سيرەك كەزدەسەتىن جەر مەتالدارى — 17 مەتالدان تۇراتىن توپ، ولار ەلەكتر قوزعالتقىشتارىن، ەلەكتروموبيلدەر، ۇيالى تەلەفوندار جانە باسقا دا ەلەكترونيكا جاساۋ ءۇشىن قاجەت. ولاردىڭ بالامالارى جوق.
