الەۋمەتتىك مەديتسينالىق ساقتاندىرۋ قورىنىڭ (امسق) باسقارما توراعاسى ابىلقايىر سقاقوۆ قىزمەتىنەن كەتتى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا ءمالىم ەتتى، دەپ حابارلايدى ”ادىرنا” ۇلتتىق پورتالى.
«بۇگىن مەن رەسمي تۇردە الەۋمەتتىك مەديتسينالىق ساقتاندىرۋ قورى باسقارما توراعاسى قىزمەتىنەن كەتتىم. بۇل مەنىڭ ويلاستىرىلعان شەشىمىم. ماعان سەنىم ارتقانى ءۇشىن مەملەكەت باسشىلىعىنا العىسىمدى بىلدىرەمىن. وسىنداي ماڭىزدى ۇيىمدى باسقارۋ – ۇلكەن جاۋاپكەرشىلىك جانە وسى باعىتتا جۇمىس ىستەپ، دەنساۋلىق ساقتاۋ سالاسىن قارجىلاندىرۋ ساياساتىن ىسكە اسىرۋ مەن ءۇشىن ۇلكەن مارتەبە بولدى»،— دەپ حابارلادى سقاقوۆ الەۋمەتتىك جەلىدەگى پاراقشاسىندا.
ول قور ۇجىمىنا العىسىن ءبىلدىرىپ، كوپتەگەن قيىندىقتاردان وتكەنىن جانە جاڭا جوبالاردى ىسكە قوسقانىن اتاپ ءوتتى.
«سونداي-اق مەديتسينا جانە ساراپشىلىق قاۋىمداستىقتاعى ارىپتەستەرىمە ەرەكشە ريزاشىلىعىمدى بىلدىرەمىن. ءبىز اشىق پىكىر الماسىپ، كەيدە قىزۋ تالقىعا تۇستىك. بىراق ءاردايىم ورتاق ماقسات – ءمامس جۇيەسىن جەتىلدىرۋ ءۇشىن جۇمىس ىستەدىك. وسىنداي بىرلەسكەن ءتيىمدى جۇمىس ءۇشىن كوپ راقمەت!» – دەپ جازدى ول.
بۇرىن پاۆلودار وبلىسىنىڭ اكىمى بولعان سقاقوۆ وسى قوردى 2023 جىلدىڭ قىركۇيەگىنەن باستاپ باسقارىپ كەلگەن بولاتىن.
ەسكە سالا كەتسەك، وتكەن جىلى قازاقستاندا پەتيتسيا پايدا بولىپ، ونىڭ اۆتورلارى مىندەتتى مەديتسينالىق ساقتاندىرۋ جۇيەسىن وزگەرتۋدى تالاپ ەتكەن ەدى.
جازدا اۋديتورلار مىندەتتى مەديتسينالىق ساقتاندىرۋ جۇيەسىندە كوپتەگەن زاڭ بۇزۋشىلىقتاردى، سونىڭ ىشىندە قوسارلانعان تولەمدەر مەن مەديتسينالىق قىزمەتتەردىڭ ساپاسىزدىعىن حابارلادى.
