يراكتا ءومىر بويىنا باس بوستاندىعىنان ايرىلعان التى قازاقستاندىق ايەل ەل ۇكىمەتىنەن كومەك سۇراپ، كەرى قايتارۋدى ءوتىندى. ولار باعداتتاعى تۇرمەدە سەگىز جىلدان بەرى جازاسىن وتەپ جاتىر، دەپ حابارلايدى "ادىرنا" ۇلتتىق پورتالى كۋرسيۆ مەديا باسىلىمىنا سىلتەمە جاساپ.
"ۆوزدۋح سۆوبودى" قوعامدىق قورىنىڭ جەتەكشىسى جاننا ۋميروۆا بۇل ايەلدەردىڭ 2021 جىلدان بەرى اۋىر جاعدايدا ەكەنىن ايتتى. ولاردىڭ سوزىنشە، جازىقسىز سوتتالىپ، زاڭسىز قاماۋعا الىنعان. بوستاندىق تالاپ ەتىپ، ءتىپتى تۇرمەدە اشتىق جاريالاعان. الايدا تۇرمە اكىمشىلىگى ولارعا مەديتسينالىق كومەك كورسەتپەگەن.
"2024 جىلدىڭ قازان ايىنان بەرى ءبىز ولاردىڭ ءىسىن قايتا قاراتۋ ءۇشىن جۇمىس ىستەپ كەلەمىز. 2017 جىلى بۇل ايەلدەر قاتەلىك جاساپ، شەتەلگە كەتكەن. جاستارىمىزدىڭ كوبى سول كەزدە اداستى، قاۋىپسىزدىك ىزدەپ، قاتەلەسكەن. بىراق ولاردى دايش-ءتىڭ جاقتاستارى دەپ قاراۋعا بولمايدى", – دەيدى جاننا ۋميروۆا.
ونىڭ ايتۋىنشا، قازاقستان بيلىگى بۇل ءىستى قاراستىرىپ جاتىر، الايدا ۇكىمەتتىڭ ناقتى قانداي شارا قابىلداپ جاتقانى بەلگىسىز.
استانادا وتكەن ءباسپاسوز ءماسليحاتىندا سوتتالعان ايەلدەردىڭ بەينەۇندەۋى كورسەتىلدى.
ء"بىز قاتەلىك جاساعانىمىزدى تۇسىنەمىز. ءبىز سوعىسۋعا ەمەس، كۇيەۋلەرىمىزبەن بىرگە ەرىپ كەلگەن ەدىك. وتانىمىزعا، تۋىستارىمىزعا ورالىپ، جاڭا ءومىر باستاۋعا كومەكتەسۋلەرىڭىزدى سۇرايمىز", – دەلىنگەن ۇندەۋدە.
ورالدىق سوتتالعان ايەلدەردىڭ ءبىرى – روزا مانسۇروۆانىڭ اناسى ءمارزيا مەدەتوۆا قىزىنىڭ ارتىنان قالعان ءۇش نەمەرەسىن باعىپ وتىرعانىن ايتتى.
"2013 جىلى قىزىم بالالارىن الىپ، كۇيەۋىنىڭ سوڭىنان كەتتى. 2019 جىلى نەمەرەلەرىمدى ەلگە قايتاردى. قازىر ولاردى جالعىز ءوسىرىپ وتىرمىن. باسقا قىزداردىڭ اتا-اناسى كەلە المادى. مەملەكەتتەن كومەك سۇرايمىز", – دەدى ول.
ادۆوكات جامبىل جولگەلديەۆ يراك بيلىگىنىڭ بۇل ايەلدەردى "تەرروريزمگە جاردەم بەردى" دەگەن ايىپپەن ءومىر بويىنا باس بوستاندىعىنان ايىرعانىن ايتتى.
"الايدا ولاردىڭ تەرروريستەرگە كومەكتەسۋ نيەتى بولماعان. ولار وتە جاس ەدى، كۇيەۋلەرىنىڭ ارتىنان ەرۋدى پارىز سانادى. كەيىن ولار سوعىستىڭ ورتاسىنا ءتۇسىپ، امان قالۋ ءۇشىن كۇرەسۋگە ءماجبۇر بولدى", – دەيدى ادۆوكات.
جاننا ۋميروۆانىڭ ايتۋىنشا، بۇل ايەلدەر ءارتۇرلى جولدارمەن سيرياعا بارعان. ءبىرى رەسەي ارقىلى، ءبىرى ازەربايجان ارقىلى ۇشقان. ولاردىڭ جاسى سول كەزدە 18-19-دا عانا بولعان.
قازىر قازاقستان بيلىگى بۇل ايەلدەردى ەلگە قايتارۋ بويىنشا ناقتى قانداي قادامدار جاساپ جاتقانى بەلگىسىز. وتباسىلارى مەن قۇقىق قورعاۋشىلار ولاردىڭ تاعدىرىنا اراشا ءتۇسۋدى سۇراپ وتىر.
