İrakta ömır boiyna bas bostandyǧynan airylǧan alty qazaqstandyq äiel el ükımetınen kömek sūrap, kerı qaitarudy ötındı. Olar Baǧdattaǧy türmede segız jyldan berı jazasyn ötep jatyr, dep habarlaidy "Adyrna" ūlttyq portaly Kursiv Media basylymyna sılteme jasap.
"Vozduh svobody" qoǧamdyq qorynyŋ jetekşısı Janna Umirova būl äielderdıŋ 2021 jyldan berı auyr jaǧdaida ekenın aitty. Olardyŋ sözınşe, jazyqsyz sottalyp, zaŋsyz qamauǧa alynǧan. Bostandyq talap etıp, tıptı türmede aştyq jariialaǧan. Alaida türme äkımşılıgı olarǧa medisinalyq kömek körsetpegen.
"2024 jyldyŋ qazan aiynan berı bız olardyŋ ısın qaita qaratu üşın jūmys ıstep kelemız. 2017 jyly būl äielder qatelık jasap, şetelge ketken. Jastarymyzdyŋ köbı sol kezde adasty, qauıpsızdık ızdep, qatelesken. Bıraq olardy DAİŞ-tıŋ jaqtastary dep qarauǧa bolmaidy", – deidı Janna Umirova.
Onyŋ aituynşa, Qazaqstan bilıgı būl ıstı qarastyryp jatyr, alaida ükımettıŋ naqty qandai şara qabyldap jatqany belgısız.
Astanada ötken baspasöz mäslihatynda sottalǧan äielderdıŋ beineündeuı körsetıldı.
"Bız qatelık jasaǧanymyzdy tüsınemız. Bız soǧysuǧa emes, küieulerımızben bırge erıp kelgen edık. Otanymyzǧa, tuystarymyzǧa oralyp, jaŋa ömır bastauǧa kömektesulerıŋızdı sūraimyz", – delıngen ündeude.
Oraldyq sottalǧan äielderdıŋ bırı – Roza Mansūrovanyŋ anasy Märziia Medetova qyzynyŋ artynan qalǧan üş nemeresın baǧyp otyrǧanyn aitty.
"2013 jyly qyzym balalaryn alyp, küieuınıŋ soŋynan kettı. 2019 jyly nemerelerımdı elge qaitardy. Qazır olardy jalǧyz ösırıp otyrmyn. Basqa qyzdardyŋ ata-anasy kele almady. Memleketten kömek sūraimyz", – dedı ol.
Advokat Jambyl Jolgeldiev İrak bilıgınıŋ būl äielderdı "terrorizmge järdem berdı" degen aiyppen ömır boiyna bas bostandyǧynan aiyrǧanyn aitty.
"Alaida olardyŋ terroristerge kömektesu nietı bolmaǧan. Olar öte jas edı, küieulerınıŋ artynan erudı paryz sanady. Keiın olar soǧystyŋ ortasyna tüsıp, aman qalu üşın küresuge mäjbür boldy", – deidı advokat.
Janna Umirovanyŋ aituynşa, būl äielder ärtürlı joldarmen Siriiaǧa barǧan. Bırı Resei arqyly, bırı Äzerbaijan arqyly ūşqan. Olardyŋ jasy sol kezde 18-19-da ǧana bolǧan.
Qazır Qazaqstan bilıgı būl äielderdı elge qaitaru boiynşa naqty qandai qadamdar jasap jatqany belgısız. Otbasylary men qūqyq qorǧauşylar olardyŋ taǧdyryna araşa tüsudı sūrap otyr.
Ūqsas jaŋalyqtar
