Irakta ómir boıyna bas bostandyǵynan aırylǵan alty qazaqstandyq áıel el úkimetinen kómek surap, keri qaıtarýdy ótindi. Olar Baǵdattaǵy túrmede segiz jyldan beri jazasyn ótep jatyr, dep habarlaıdy "Adyrna" ulttyq portaly Kýrsıv Medıa basylymyna silteme jasap.
"Vozdýh svobody" qoǵamdyq qorynyń jetekshisi Janna Ýmırova bul áıelderdiń 2021 jyldan beri aýyr jaǵdaıda ekenin aıtty. Olardyń sózinshe, jazyqsyz sottalyp, zańsyz qamaýǵa alynǵan. Bostandyq talap etip, tipti túrmede ashtyq jarııalaǵan. Alaıda túrme ákimshiligi olarǵa medıınalyq kómek kórsetpegen.
"2024 jyldyń qazan aıynan beri biz olardyń isin qaıta qaratý úshin jumys istep kelemiz. 2017 jyly bul áıelder qatelik jasap, shetelge ketken. Jastarymyzdyń kóbi sol kezde adasty, qaýipsizdik izdep, qatelesken. Biraq olardy DAISh-tiń jaqtastary dep qaraýǵa bolmaıdy", – deıdi Janna Ýmırova.
Onyń aıtýynsha, Qazaqstan bıligi bul isti qarastyryp jatyr, alaıda úkimettiń naqty qandaı shara qabyldap jatqany belgisiz.
Astanada ótken baspasóz máslıhatynda sottalǵan áıelderdiń beıneúndeýi kórsetildi.
"Biz qatelik jasaǵanymyzdy túsinemiz. Biz soǵysýǵa emes, kúıeýlerimizben birge erip kelgen edik. Otanymyzǵa, týystarymyzǵa oralyp, jańa ómir bastaýǵa kómektesýlerińizdi suraımyz", – delingen úndeýde.
Oraldyq sottalǵan áıelderdiń biri – Roza Mansurovanyń anasy Márzııa Medetova qyzynyń artynan qalǵan úsh nemeresin baǵyp otyrǵanyn aıtty.
"2013 jyly qyzym balalaryn alyp, kúıeýiniń sońynan ketti. 2019 jyly nemerelerimdi elge qaıtardy. Qazir olardy jalǵyz ósirip otyrmyn. Basqa qyzdardyń ata-anasy kele almady. Memleketten kómek suraımyz", – dedi ol.
Advokat Jambyl Jolgeldıev Irak bıliginiń bul áıelderdi "terrorızmge járdem berdi" degen aıyppen ómir boıyna bas bostandyǵynan aıyrǵanyn aıtty.
"Alaıda olardyń terrorısterge kómektesý nıeti bolmaǵan. Olar óte jas edi, kúıeýleriniń artynan erýdi paryz sanady. Keıin olar soǵystyń ortasyna túsip, aman qalý úshin kúresýge májbúr boldy", – deıdi advokat.
Janna Ýmırovanyń aıtýynsha, bul áıelder ártúrli joldarmen Sırııaǵa barǵan. Biri Reseı arqyly, biri Ázerbaıjan arqyly ushqan. Olardyń jasy sol kezde 18-19-da ǵana bolǵan.
Qazir Qazaqstan bıligi bul áıelderdi elge qaıtarý boıynsha naqty qandaı qadamdar jasap jatqany belgisiz. Otbasylary men quqyq qorǵaýshylar olardyń taǵdyryna arasha túsýdi surap otyr.
