ۆاشينگتونداعى اۋەدە بولعان جولاۋشى ۇشاعى مەن اسكەري تىكۇشاقتىڭ اپاتىنا قاتىستى باق جاڭا مالىمەتتەردى جاريالادى. اۋەجايدا بۇل ساتتە ديسپەتچەرلەردىڭ اۋىسىمى تولىق بولماعان. بۇل تۋرالى New York Times اقش ازاماتتىق اۆياتسيا فەدەراتسياسىنىڭ (FAA) الدىن الا ەسەپتەرىنە سىلتەمە جاساپ جازدى، دەپ حابارلايدى “ادىرنا” ۇلتتىق پورتالى.
بەرىلگەن اقپارات بويىنشا، ۆاشينگتونداعى رونالد رەيگان اتىنداعى اۋەجايدا ۇشاق پەن تىكۇشاقتىڭ سوقتىعىسۋى كەزىندە ديسپەتچەرلىك اۋىسىم تولىق بولماعان. بىرنەشە مىندەتتى ءبىر ديسپەتچەر ورىنداپ، ول تىكۇشاقتاردىڭ قوزعالىسىن جانە ۇشاقتاردىڭ قونۋىن ۇيلەستىرگەن.
ەسەپتە كورسەتىلگەندەي، ۇيلەستىرۋدى قيىنداتقان نەگىزگى فاكتورلاردىڭ ءبىرى - قىزمەتكەرلەردىڭ جەتىسپەۋشىلىگى بولدى، سەبەبى ۇشاقتار مەن تىكۇشاقتاردىڭ پيلوتتارى ءارتۇرلى راديوجيىلىكتەردى پايدالانىپ، ءبىر-ءبىرىن ءاردايىم ەستي بەرمەيدى.
سونىمەن قاتار، اقش تاسىمالداۋ قاۋىپسىزدىگى ۇلتتىق كەڭەسىنىڭ (NTSB) وكىلى تودد ينمان ءباسپاسوز ءماسليحاتىندا ۇشاق پەن تىكۇشاق اپاتىنىڭ تەرگەۋى تولىق سەبەپتەرىن انىقتاعانشا جالعاساتىنىن ايتتى.
«ءبىزدىڭ ماقساتىمىز – نە بولعانىن عانا ەمەس، نەگە ولاي بولعانىن ءتۇسىنۋ، سونداي-اق مۇنداي جاعدايلاردىڭ بولماۋى ءۇشىن قانداي شارالار قابىلداۋعا بولاتىنىن ۇسىنۋ. ءبىز تەرگەۋدى ەندى عانا باستاپ جاتىرمىز، جانە بىزدە ازىرگە كوپ اقپارات جوق، بىراق ءبىز ۇنەمى جاڭارتۋلار بەرىپ وتىرامىز»، - دەپ مالىمدەدى ول.
ونىڭ ايتۋىنشا، تەرگەۋ توبى ورىن العان جەردەن بارلىق ماڭىزدى دالەلدەر جيناعانشا سوندا بولادى.
«ءبىز العاشقى ەسەپتى 30 كۇن ىشىندە دايىنداۋدى جوسپارلاپ وتىرمىز، بىراق سوڭعى قورىتىندىلار تەرگەۋ تولىق اياقتالعاننان كەيىن عانا جاسالادى»، - دەدى NTSB وكىلى، بۇل اپاتتىڭ ىقتيمال سەبەپتەرىن قازىر بولجامايتىندارىن ايتتى.
سونىمەن قاتار، قۇتقارۋشىلار ۆاشينگتونداعى رونالد رەيگان اتىنداعى ۇلتتىق اۋەجايىنا جاقىن جەردە American Airlines جولاۋشىلار ۇشاعى مەن Black Hawk اسكەري تىكۇشاعىنىڭ سوقتىعىسۋى سالدارىنان پوتوماك وزەنىنەن 18 قازا تاپقان ادامنىڭ دەنەسىن الىپ شىققانى انىقتالدى.
CNN مالىمەتى بويىنشا، وزەننەن ەشبىر ءتىرى قالعان ادامدى الىپ شىعۋ مۇمكىن بولمادى، قازىرگى ۋاقىتتا قۇتقارۋ جۇمىستارى جالعاسۋدا.
American Airlines اۋەكومپانياسى ۇشاقتا 60 جولاۋشى مەن ءتورت ەكيپاج مۇشەسى بولعانىن راستادى. كومپانيا قازا تاپقانداردىڭ تۋىستارىنا ارنالعان تەلەفون جەلىسىن اشتى.
Black Hawk تىكۇشاعىندا ءۇش اسكەري قىزمەتكەر بولعان، دەپ حابارلايدى CNN اقش قورعانىس مينيسترلىگىنىڭ وكىلىنە سىلتەمە جاساپ.
اقش پرەزيدەنتى دونالد ترامپ بۇل اپات تۋرالى "تولىق حاباردار" ەكەنىن ايتىپ، جاعدايدى باقىلاپ وتىرعانىن جانە جاڭا مالىمەتتەر پايدا بولعان سايىن ولاردى جاريالايتىنىن مالىمدەدى.
اقش قورعانىس ءمينيسترى پيت حەگسەت X الەۋمەتتىك جەلىسىندە پەنتاگوننىڭ جاعدايدى "بەلسەندى تۇردە باقىلاپ وتىرعانىن" جانە قاجەت بولعان جاعدايدا كومەك كورسەتۋگە دايىن ەكەنىن جەتكىزدى.
اقش ازاماتتىق اۆياتسيا فەدەراتسياسى (FAA) حابارلاعانداي، ۋيچيتو قالاسىنان (كانزاس شتاتى) ۇشىپ شىققان جولاۋشى ۇشاعى سول كۇنى 21:00 شاماسىندا سولتۇستىك امەريكالىق شىعىس ۋاقىتى بويىنشا نەمەسە 02:00 گرينۆيچ ۋاقىتى بويىنشا Black Hawk اسكەري تىكۇشاعىمەن اۋەدە سوقتىعىسقان. رونالد رەيگان اتىنداعى ۇلتتىق اۋەجاي بارلىق ۇشاقتاردىڭ ۇشۋىن جانە قونۋىن توقتاتتى.
ايتا كەتەيىك، Bombardier CRJ700 ۇشاعىنىڭ اپاتى 30 قاڭتاردا تۇندە ورىن الدى. ۇشاق رونالد رەيگان اتىنداعى اۋەجايعا قونۋعا بەت العان ساتتە پوتوماك وزەنىنىڭ ۇستىندە اسكەري Black Hawk تىكۇشاعىمەن سوقتىعىستى. تىكۇشاق وقۋ ۇشۋى كەزىندە بولعان.
