فوتو: J MILES CARY/REUTERS
اقش-تىڭ تەننەسسي شتاتىندا كىسى ولتىرگەنى ءۇشىن ءولىم جازاسىنا كەسىلگەن كريستا پايكقا قاتىستى ۇكىمدى ورىنداۋ ءساتسىز اياقتالعان بولاتىن. وعان ولىمگە اكەلەتىن ينەكتسيا ەكى رەت جاسالعانىمەن، 50 جاستاعى ايەل ءتىرى قالعان. قازىر ول اۋرۋحانادا اۋىر جاعدايدا جاتىر. ەندى ءولىم جازاسىن ورىنداۋ 2026 جىلدىڭ سوڭىنا دەيىن توقتاتىلدى. بۇل تۋرالى BBC جازدى، دەپ حابارلايدى «ادىرنا».
ۇكىمدى ورىنداۋ كەزىندە پايكقا پەنتوباربيتال پرەپاراتىنىڭ ەكى دوزاسى سالىنعان. ادۆوكاتتارىنىڭ مالىمەتىنشە، ونىڭ جۇرەك سوعىسى توقتاماعان.
وقيعادان كەيىن تەننەسسي گۋبەرناتورى بيلل لي تاۋەلسىز تەكسەرۋ جۇرگىزۋدى تاپسىردى. سونىمەن قاتار شتاتتا ءولىم جازالارىن ورىنداۋ 2026 جىلدىڭ سوڭىنا دەيىن توقتاتىلدى.
AP اگەنتتىگىنىڭ حابارلاۋىنشا، تەننەسسي شتاتىنداعى حاتتامادا ەكىنشى ينەكتسيادان كەيىن دە سوتتالعان ادام ءتىرى قالعان جاعدايدا قانداي ارەكەت جاساۋ كەرەگى ناقتى كورسەتىلمەگەن.
پايكقا قاتىستى بۇدان ءارى قانداي شەشىم قابىلداناتىنى ازىرگە بەلگىسىز.
ەسكە سالايىق، 1995 جىلى 18 جاستاعى كريستا پايك پەن ونىڭ سەرىكتەسى تاداريل شيپپ پايكتىڭ 19 جاستاعى سىنىپتاسى كوللين سلەممەردى ولتىرگەن. ءبىر جىلدان كەيىن پايك ءبىرىنشى دارەجەلى كىسى ءولتىردى دەپ تانىلىپ، ءولىم جازاسىنا كەسىلدى. ال قىلمىس جاسالعان كەزدە 17 جاستا بولعان شيپپ شارتتى تۇردە مەرزىمىنەن بۇرىن بوساتۋ مۇمكىندىگى قاراستىرىلعان ءومىر بويى باس بوستاندىعىنان ايىرۋ جازاسىن الدى.
كريستا پايك اقش-تىڭ قازىرگى تاريحىنداعى ءولىم جازاسىنا كەسىلگەن ەڭ جاس ايەل اتاندى. ءىس بۇكىل ەلدە ۇلكەن رەزونانس تۋدىردى، ويتكەنى سلەممەردىڭ ءمايىتى كەۋدەسىنە ءساتانيزمنىڭ سيمۆولى سانالاتىن پەنتاگرامما ويىپ سالىنعان كۇيدە تابىلعان.
پايكتىڭ ادۆوكاتتارى وعان كەشىرىم جاساۋدى سۇراعان. ولاردىڭ ايتۋىنشا، ول قىلمىستى نەبارى 18 جاسىندا جاساعان جانە اناسىنىڭ كۇيەۋلەرى تاراپىنان ۇزاق جىلدار بويى جىنىستىق زورلىق-زومبىلىق كورىپ، پسيحيكالىق دەنساۋلىعىنا بايلانىستى قيىندىقتارعا، سونىڭ ىشىندە بيپوليارلىق بۇزىلىسقا شالدىققان.
