قازاقستاندا 2025 جىل باستالا سالىسىمەن كارتوپتىڭ باعاسى كۇرت ءوستى. 21 قاڭتاردا رەسپۋبليكا بويىنشا كارتوپ ورتا ەسەپپەن 320 تەڭگەدەن ساتىلدى. استانانىڭ ازىق-تۇلىك دۇكەندەرىندە ءار ادام تەك 5 كگ كارتوپ الا الاتىنداي جاعداي قالىپتاستى. ۇكىمەتتىڭ ءباسپاسوز قىزمەتى باعانىڭ كۇرت وسۋىنە كارتوپتى كورشى ەلدەرگە جەتكىزۋ مولشەرىنىڭ ارتۋى سەبەپ بولعانىن جانە كارتوپ ەكسپورتى التى ايعا توقتاتىلعانىن حابارلادى.
اۋىل شارۋاشىلىعى سالاسى بويىنشا ساراپشى - كيريلل پاۆلوۆ Taspanews.kz تىلشىسىنە شارۋا قوجالىقتارىنىڭ ساتۋ باعاسى، تاۋار قۇنىن مەملەكەتتىك رەتتەۋ جانە جاقىن ارادا تاعى قانداي ازىق-تۇلىك ءتۇرى قىمباتتاۋى مۇمكىن ەكەندىگى تۋرالى ايتتى.
پاۆلوۆ كارتوپ باعاسىن مەملەكەت رەتتەي الا ما دەگەن سۇراققا ەڭ الدىمەن مەملەكەتتىڭ ءوزى جاۋاپ بەرۋى كەرەك دەگەن ويدا.
«نارىق جانە وعان اسەر ەتەتىن تەتىكتەر بار. سونىمەن قاتار، مەملەكەتتىك رەتتەۋ كەزىندە دە ماجبۇرلەۋ شارالارى قولدانىلۋى مۇمكىن، الايدا بۇل جاعىمدى اسەر ەتە مە، جاعىمسىز اسەر ەتە مە بەلگىسىز»، - دەپ سانايدى ساراپشى.
كيريلل پاۆلوۆ ەلدەگى كارتوپ باعاسىنىڭ وسۋىنە ءونىمدى حالىققا تىكەلەي ساتۋشىلار ۇلەس قوسقانىنا سەنىمدى، ياعني فەرمەرلەردەن وتكەن ءونىم بىزگە اسىرا سىلتەنگەن ۇستەمە باعامەن كەلەدى.
«فەرمەرلەر كارتوپتى ءتيىمدى باعامەن ساتادى. وتكەن جىلى ولار كارتوپتى ءتىپتى ءوز قۇنىنان تومەن باعادا ساتقان، وسى جىلى دا ۇستىنەن تۇسەتىن پايداسى كوپ بولمادى. ولاردىڭ باعاسىن جوعارى دەپ ايتۋعا كەلمەيدى: كارتوپ ءۇشىن سوما ورتا ەسەپپەن 120-150 تەڭگەدەن باستالىپ، كەيبىر تاڭداۋلى سورتتار ءۇشىن 180 تەڭگەمەن شەكتەلەدى»،—دەيدى ساراپشى.
ماماننىڭ ايتۋىنشا، كارتوپ قويمالاردان وسى باعامەن شىعادى.
«تەوريالىق تۇرعىدان قاراساق، مەنىڭ ويىمشا، كوكتەمدە پياز باعاسى كوتەرىلىپ كەتۋى مۇمكىن، سەبەبى ورتالىق ازياداعى مۇمكىن بولاتىن جاعدايلار بىزگە دە اسەر ەتۋى ىقتيمال. تىنىق مۇحيتىنداعى تومەن تەمپەراتۋرانىڭ اسەرى اۋعانستاندا، پاكىستاندا جانە يراندا قۇرعاقشىلىق پەن جوعارى تەمپەراتۋرانى تۋعىزادى»، – دەپ ءبولىستى ساراپشى.
ناتيجەسىندە، اتالعان مەملەكەتتەر ەگىن تاپشىلىعىنا تاپ بولۋى مۇمكىن جانە بۇل بىزدەگى پيازدىڭ باعاسىنا اسەر ەتەرى ءسوزسىز. وسىلايشا، قازاقستاندىقتار پياز شارۋاشىلىعىمەن جاپپاي اينالىسا باستايدى. مۇنداي جاعداي - قالىپتى ءۇردىس.
«ءبىزدىڭ فەرمەرلەر پيازدىڭ قىمباتتاعانىن بىلە سالا، ونى جاپپاي وسىرە باستاۋى مۇمكىن. ماسەلەن، جامبىل وبلىسىندا كەمىندە ءجۇز گەكتار جەرى بارلاردىڭ ءبارى پياز ەگۋگە كىرىسىپ كەتسە، كەلەسى جىلى پياز باعاسى تومەندەپ كەتۋى مۇمكىن، سەبەبى كوكونىستىڭ ەلدە كوپ بولۋى باعانىڭ قۇلدىراۋىنا اكەلىپ سوعادى. بۇل فەرمەرلەرگە قولايسىز»، – دەيدى پاۆلوۆ.
