شىمكەنتتە سەگىزىنشى سىنىپ وقۋشىسى ساباق ۇستىندە قازا تاپتى. بۇل تۋرالى الماتى ارناسى جاريالادى، دەپ حابارلايدى “ادىرنا” ۇلتتىق پورتالى.
وقيعا قالاداعى جەكەمەنشىك وقۋ ورىندارىنىڭ بىرىندە بولعان.
اقپاراتقا سۇيەنسەك، وقۋشى ءوز-وزىنە قول جۇمساعان بولۋى مۇمكىن.
وقۋشى قىز ساباق ۋاقىتىندا سۇرانعان، بىراق مۇعالىم ونى جىبەرمەگەن. سالدارىنان جەدەل جاردەم كەلگەنشە 14 جاستاعى قىزدىڭ جۇرەگى توقتاپ، ساباق ۇستىندە ەسىنەن تانىپ قالعان.
“ناۋقاس وتە اۋىر جاعدايدا كەلدى. ول بىردەن جانساقتاۋ بولىمىنە جەتكىزىلدى. ونىڭ جۇرەگى ءۇش رەت توقتاپ قالدى. قايتا-قايتا جۇرەگىن قايتا سوعۋعا تىرىسقانىمىزبەن، ناۋقاستى امان الىپ قالا المادىق", – دەيدى ت.ورىنباەۆ اتىنداعى گيپەرباريكالىق وكسيگەناتسيا ورتالىعىنىڭ توكسيكولوگيا ءبولىمىنىڭ مەڭگەرۋشىسى اسىلحان مىڭبوسىنوۆ.
قازىر پوليتسيا ء"وزىن-ءوزى ولتىرۋگە يتەرمەلەۋ" بابى بويىنشا تەرگەۋ جۇرگىزۋدە. قىلمىسكەر 8 جىلعا دەيىن باس بوستاندىعىنان ايىرىلۋى مۇمكىن.
الدىن الا بولجام بويىنشا، قىز اجەسىنە ارنالعان جۇرەك تابلەتكالارىن قابىلداعان، بۇل ولىمگە اكەلۋى مۇمكىن.
“قازان ايىندا سىنىپ جەتەكشىسى قىزدىڭ بىلەگىنىڭ كەسىلگەنىن بايقادى. اناسىن شاقىردىق. قىزدى وسى ۋاقىت بويى پسيحولوگ باقىلاعان. دەگەنمەن ولار بۇل قىزدىڭ جاي عانا وزىنە نازار اۋدارتۋى دەدى. بىراق مۇنداي جاعدايدىڭ بارلىعى مەكتەپتە باقىلاۋعا الىنادى. اناسىنا ءبارى بەلگىلى بولعان", – دەيدى جەكەمەنشىك مەكتەپ ديرەكتورى يۋليا كوربان.
پوليتسيا جاعدايدى تەرگەپ جاتىر.
