اباي وبلىسىندا جىلىتۋ ماۋسىمىنا دايىنداۋ جۇمىستارىنىڭ بەلگىلەنگەن مەرزىمنەن كەشىگىپ جاتقانى انىقتالدى، دەپ حابارلايدى “ادىرنا”.
پرەمەر-مينيستر ولجاس بەكتەنوۆ سەمەي قالاسىنداعى جاعدايعا بايلانىستى وبلىس اكىمىنىڭ جاۋاپتى ورىنباسارىن تارتىپتىك جاۋاپكەرشىلىككە تارتۋدى تاپسىردى.
پرەمەر-ءمينيستردىڭ ايتۋىنشا، بارلىق وڭىرلەر دايىندىق جۇمىستارىن بەلگىلەنگەن مەرزىمدە اياقتاعان. الايدا اباي وبلىسىندا، ناقتىراق ايتقاندا، سەمەي قالاسىندا جىلۋ جەلىلەرىن دايىنداۋ جۇمىستارى كەستەدەن قالىپ وتىر.
وسىعان بايلانىستى ولجاس بەكتەنوۆ وبلىس اكىمىنىڭ جىلۋمەن قامتۋ ماسەلەسىنە جەتەكشىلىك ەتەتىن ورىنباسارىن تارتىپتىك جاۋاپكەرشىلىككە تارتۋدى تاپسىردى.
ء«تيىستى ۇيلەستىرۋدىڭ بولماۋى جانە سەمەي قالاسىنىڭ جىلۋ جەلىلەرىن ۋاقتىلى دايىنداماۋىنا بايلانىستى اباي وبلىسى اكىمىنىڭ جاۋاپتى ورىنباسارىن تارتىپتىك جاۋاپكەرشىلىككە تارتۋدى تاپسىرامىن»، – دەدى پرەمەر-مينيستر.
اباي وبلىسى اكىمدىگىنىڭ مالىمەتىنشە، جىلۋمەن قامتۋ جانە جىلىتۋ ماسەلەسىنە وبلىس اكىمىنىڭ ورىنباسارى بەكجان باپىشەۆ جەتەكشىلىك ەتەدى.
سونىمەن قاتار ۇكىمەت باسشىسى ءوڭىر اكىمدەرىنە جىلىتۋ ماۋسىمىنىڭ ءوتۋىن باقىلاۋ جونىندەگى وڭىرلىك شتابتاردىڭ جۇمىسىن قايتا جانداندىرۋدى تاپسىردى. ەنەرگيا كوزدەرىنىڭ دايىندىعىن تۇراقتى تۇردە تەكسەرۋ قاجەت.
ول جوسپارلى كورسەتكىشتەردىڭ ساقتالۋىن، وتىننىڭ نورماتيۆتىك قورىن قامتاماسىز ەتۋدى جانە رەزەرۆتىك جابدىقتاردىڭ دايىن بولۋىن باقىلاۋدا ۇستاۋدى تاپسىردى. بۇدان بولەك، حالىق ءۇشىن كومىردىڭ جەتكىلىكتى بولۋى جانە ونىڭ تۇراقتى باعامەن ساتىلۋى دا تۇراقتى باقىلاۋدا بولۋى ءتيىس.
