Senat depýtattary Premer-mınıstrdiń atyna saýal joldap, 1980 jyly salynǵan Baıqońyr mańyndaǵy «Iýbıleınyı» aerodromyn Qazaqstannyń kommýnaldyq menshigine alyp, onyń bazasynda avıa otyn quıatyn keshen qurýdy usynǵan bolatyn. Alaıda, bul bastama Úkimet tarapynan qoldaý tappady, dep habarlaıdy "Adyrna" ulttyq portaly.
Premer-mınıstrdiń jaýabynda «Iýbıleınyı» aerodromy 1994 jyldan beri Reseı Federaııasyna jalǵa berilgen «Baıqońyr» kesheniniń quramyna kiretinin jáne qazirgi ınfraqurylymnyń qanaǵattanarlyqsyz ekenin atap ótti.
Aerodromnyń ushý-qoný jolaǵy uzyndyǵy 4,5 shaqyrymdy, eni 84 metrdi quraıdy, al beton jabyndysynyń qalyńdyǵy 32 santımetr. Kezinde bul áýeaılaq 392 tonnaǵa deıingi salmaqtaǵy ushaqtardy qabyldaı alatyn edi. Alaıda, 2020 jyly Reseı bul nysandy ózderiniń memlekettik tiziliminen shyǵaryp, onyń jumysy toqtatylǵan. Qazirgi ýaqytta aerodromnyń mártebesi men menshik ıesi belgisiz.
Premer-mınıstrdiń aıtýynsha, áýeaılaqty qaıta iske qosý úshin aýqymdy ınfraqurylymdyq jańartý jumystary qajet. Oǵan áýeaılaq ınfraqurylymyn qalpyna keltirý, arnaıy tehnıka satyp alý, jańa personal daıyndaý sııaqty kóptegen qomaqty qarjylaı shyǵyndar kerek.
Sondaı-aq, úkimet basshysy avıa otyn ımportynyń artýyna jáne Qazaqstandaǵy iri áýejaılardyń janarmaı quıý keshenderin jańǵyrtý jumystary júrgizilip jatqanyn eskere otyryp, «Iýbıleınyı» aerodromyn avıa otyn quıý stanııasy retinde paıdalaný tıimsiz dep sanaıdy.
"Baıqońyr qalasyna jaqyn ornalasqan Qyzylorda áýejaıynyń bar ekenin jáne eksporttyq taýar óndirisiniń bolmaýyn nazarǵa ala otyryp, «Iýbıleınyı» aerodromyn mýltımodaldy avıahab retinde paıdalaný qazirgi ýaqytta tıimsiz dep esepteımiz", — dep jazylǵan resmı jaýapta.
