ماقسات تولىقباي: مال ۇرلىعىنا توقتاۋ سالۋ قاجەت

قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماقسات تولىقبايۇلى شىعىس قازاقستان وبلىسى قاتونقاراعاي اۋدانىنداعى مال ۇرلىعىن نازارعا الا وتىرىپ، قازاقستان رەسپۋبليكاسىنىڭ ىشكى ىستەر ءمينيسترى ەرجان  سادەنوۆكە دەپۋتاتتىق ساۋال جولدادى.  شىعىس قازاقستان وبلىسىنداعى قاتونقاراعاي اۋدانىنىڭ تۇرعىندارى مال ۇرلىعىنىڭ سالدارىنان قيىن جاعدايعا تاپ بولعان. دەپۋتات اۋىل حالقىنىڭ پرەزيدەنتتەن كومەك سۇراۋعا ءماجبۇر بولعان الەۋمەتتىك جەلىگە شىققان ۆيدەوۇندەۋلەرىن العا تارتىپ، وزىنە دە ون شاقتى ادامنىڭ وسى ماسەلە بويىنشا حابارلاسقانىن ايتتى. "كاتونقاراعايعا قاراستى شىڭعىستايدىڭ شىرقىن وسى ۇرىلار بۇزىپ ءبىتىردى. الاقانداي اۋىل حالقىنا ۇرى-قارىنىڭ قورلىعى ابدەن وتكەن. توزىمدەرى تاۋسىلىپ، سەنىمدەرى سەتىنەگەن ەل ەندى بار ۇمىتتەرىن ەل باسشىلىعىنا ارتىپ، ياعني پرەزيدەنتتەن كومەك سۇراپ وتىر. ويتكەنى قوي قورالاپ، ءىرى-قارا تابىنداپ، جىلقىسى ءۇيىر-ۇيىرىمەن جوعالىپ جاتقان سوڭ قايتسىن؟! پوليتسيا دەگەننەن ابدەن كۇدەر ۇزگەن. وسى كۇنگە دەيىن قانشاما مالى قولدى بولىپ، ۇرلانسا دا، پوليتسيا بىردە-ءبىر «تىشقاق لاقتىڭ» سايدان سانىن، قۇمنان ءىزىن تاپپاعان. بۇل نەنى كورسەتەدى؟! نە ىزدەۋگە قۇلىقسىز نەمەسە ۇرى مەن پوليتسيا اۋىز جالاسىپ، ىمىرالىسىپ، ىنتىماقتا جۇمىس ىستەيدى. اقيقاتى وسى" - دەدى ماقسات تولىقباي. تۇرعىنداردىڭ ايتۋىنشا، پوليتسيا مەن ۇرىلار اراسىندا سىبايلاسقان بولۋى مۇمكىن.  اۋىل تۇرعىندارى وبلىستىق جانە اۋداندىق ىشكى ىستەر ورگاندارىنا بىرنەشە رەت ارىزدانعان، بىراق بۇل شاعىمدار جاۋاپسىز قالۋدا. "قىلمىستىق كودەكس بويىنشا بۇل ورتاشا اۋىر قىلمىس. اسا iرi مولشەردە جاسالعان مال ۇرلاعاندار 7 جىلدان 12 جىلعا دەيiنگi سوتتالادى»،-دەپ حالىقتى سەندىرگىمىز كەلەدى. ءتىپتى، مال ۇرلىعى ازايىپ كەلەدى دەپ ءبىزدى دە ىشكى ىستەر ورگاندارى سەندىرگىلەرى كەلەدى. ال ءىس جۇزىندە ءبارى كەرىسىنشە" - دەدى ول. ماقسات تولىقباي مينيسترلىككە بۇل ماسەلەگە ارنايى نازار اۋدارۋدى جانە قاتونقاراعاي اۋدانىندا رەيد وتكىزىپ، مال ۇرلىعىن توقتاتۋ بويىنشا كەشەندى شارالار قابىلداۋدى سۇرادى.