جىل باسىنان بەرى قاراعاندى وبلىسىندا «التىن جاس» باعدارلاماسى ىسكە قوسىلدى. بۇل – ءوڭىر باسشىسى ەرماعانبەت بولەكپاەۆتىڭ باستاماسى. ونىڭ جەكە قابىلداۋىنا ەگدە جاستاعى ادامدار ءجيى شاعىمدانىپ، جۇمىس تابا الماي جاتادى. باعدارلاما سۇرانىسقا يە. ءبىر ايدان از ۋاقىت ارالىعىندا جۇزگە جۋىق ادام جۇمىسقا ورنالاستىرىلدى.
باعدارلاما وبلىستىق بيۋدجەتتەن قارجىلاندىرىلادى. ونىڭ ەرەكشەلىگى – ءوز كومانداسىنا زەينەتكەردى قابىلداعان جۇمىس بەرۋشىلەرگە ونىڭ جالاقىسىنىڭ جارتىسى سۋبسيديالانادى، بىراق ءبىر ەڭ تومەنگى جالاقىدان ارتىق ەمەس (2025 جىلى – 85 مىڭ تەڭگە). الايدە بۇل شەكتەۋدىڭ وزىندە دە زەينەتاقىنىڭ ءوسىمى جامان ەمەس، سەبەبى جۇمىس بەرۋشى دە وسىنشا قوسادى.
العاشقىلاردىڭ ءبىرى بولىپ زەينەتكەر مۇعالىمدەردى قابىلداپ العان جەكەمەنشىك ءبىلىم بەرۋ ورتالىقتارى بولدى.
ءداريا نۇرەكينا 44 جىل اۋىلدىق مەكتەپتە باستاۋىش سىنىپ مۇعالىمى بولىپ جۇمىس ىستەگەن. سەگىز جىل بۇرىن زەينەتكەرلىككە شىققان. شەت اۋدانىنىڭ اقجال اۋىلىنان بالالارىمەن بىرگە قالاعا كوشىپ كەلدى.
– ۇيدە وتىرعىم كەلمەيدى، كومەگىم تيگەنىن قالايمىن. ينستاگرامنان وسىنداي باعدارلاما تۋرالى حابارلامانى كورىپ، بايقاپ كورۋگە شەشىم قابىلدادىم. مانساپ ورتالىعىنا باردىم. 8 قاڭتاردان باستاپ وسىندا، دامۋ ورتالىعىندا جۇمىس ىستەيمىن. بالالارمەن اينالىسامىن، ولاردىڭ مەكتەپكە دايىندالۋىنا كومەكتەسەمىن. ءبارى ۇنايدى: سۇيىكتى جۇمىسىم، ورتالىق ءۇيدىڭ جانىندا – جاياۋ كەلەمىن، – دەيدى ءداريا نۇرەكينا.
ورتالىقتىڭ اكىمشىسى ايدا وتەۋوۆانىڭ ايتۋىنشا، كۇن سايىن ولارعا 50-گە دەيىن بالا كەلەدى. كوپتەگەن اتا-انالار جاسى ەگدە، تاجىريبەسى بار پەداگوگتاردى قالايدى، سوندىقتان جاڭا پايدالى قىزمەتكەر تاپقاندارىنا قۋانىشتى.
«التىن جاس» باعدارلاماسى بويىنشا اقپان ايىنان باستاپ ورتالىققا تاعى ءبىر زەينەتكەر – ۋنيۆەرسيتەتتىڭ بۇرىنعى وقىتۋشىسى جۇمىسقا كەلەدى. ول بالالارعا اعىلشىن ءتىلىن ۇيرەتەدى.
ءلاززات اسىلبەكوۆا 40 جىلدان استام قارقارالى اۋدانىنىڭ تومار اۋىلىندا باستاۋىش سىنىپ مۇعالىمى بولىپ جۇمىس ىستەگەن. وتكەن جىلى زەينەتكە شىعىپ، قاراعاندىعا كوشكەن. قاڭتار ايىندا باعدارلاما بويىنشا وڭتۇستىك-شىعىستاعى جاڭا كوپقاباتتى ۇيلەردىڭ بىرىندە اشىلعان جاڭا شاعىن ورتالىققا ورنالاستى. كۇن سايىن جۇمىسقا مايقۇدىقتان كەلەدى.
– باعدارلامانى قۇرعاندارعا راحمەت! زەينەتكەرلەر ءۇشىن بۇل جاقسى قولداۋ. بالالاردى جاقسى كورەمىن. دەنساۋلىعىم جۇمىس ىستەۋگە مۇمكىندىك بەرەدى. رەتى بولسا، ۇيدە وتىرماڭىزدار! ءتورت قابىرعاعا قامالىپ وتىرا بەرسەڭىزدەر، تەز قارتايىپ كەتەسىزدەر. ال بۇل جەردە ءوزىمدى قاجەت سەزىنەمىن، بارشاعا پايداسى بار: ءبىز ءوز تاجىريبەمىزدى جاستارعا بەرەمىز، ال ولاردان جاڭا نارسە ۇيرەنۋگە بولادى، – دەپ ءلاززات اسىلبەكوۆا قۇرداستارىن باعدارلاماعا قاتىسۋعا شاقىرادى.
زەينەتكەر قوسىمشا تابىسىن جيناپ، قازاقستاندى ارالاعىسى كەلەدى.
– ەگدە جاستاعى ادامداردى رەسمي جۇمىسقا ورنالاستىرۋ ءۇشىن «التىن جاس» ارنايى باعدارلاماسى ازىرلەندى. ول زەينەتكەرلىككە شىققان، بىراق كۇش-قۋاتى مول جانە تابىسىن ارتتىرعىسى كەلەتىن ءوڭىر تۇرعىندارىنا ارنالعان. قاراعاندى وبلىسىندا 180 مىڭنان استام زەينەتكەر تۇرادى، – دەيدى قاراعاندى وبلىسى بويىنشا ەڭبەك ۇتقىرلىعى ورتالىعىنىڭ باسشىسى نۇرجان سىزدىقوۆ. – بۇگىنگى تاڭدا باعدارلاماعا قاتىسۋعا 146 جۇمىس بەرۋشى نيەت ءبىلدىردى. جۇمىسقا 96 ادام جىبەرىلدى. نەگىزىنەن ولار باستاۋىش سىنىپ مۇعالىمدەرى، بۋحگالتەرلەر، مەنەدجەرلەر، كۇزەتشىلەر. ماماندىقتار بويىنشا ەشقانداي شەكتەۋ جوق، ءتۇرلى ماماندىقتار بويىنشا جۇمىس تابا الامىز.
بيىل «التىن جاس» باعدارلاماسى بويىنشا 400 ادامدى جۇمىسپەن قامتۋ جوسپارلانعان، ال كەلەسى جىلدارى ولاردىڭ سانى ارتاتىن بولادى.
