اقش-تىڭ 22 شتاتىنىڭ باس پروكۋرورلارى جانە سان-فرانتسيسكو قالاسى مەن كولۋمبيا وكرۋگى پرەزيدەنت دونالد ترامپتىڭ ازاماتتىق الۋ قۇقىعىن شەكتەۋگە باعىتتالعان جارلىعىن بۇعاتتاۋدى تالاپ ەتىپ، سوتقا شاعىم ءتۇسىردى، دەپ حابارلايدى "ادىرنا" ۇلتتىق پورتالى "امەريكا داۋسىنا" سىلتەمە جاساپ.
يناۋگۋراتسيا كۇنى پرەزيدەنت جارلىققا قول قويدى. وعان سايكەس كەلەسى ايدان باستاپ اقش اۋماعىندا دۇنيەگە كەلگەن انالارى ەلدە زاڭسىز جۇرگەن نەمەسە يمميگراتسيالىق ۆيزاسى جوق، ال اكەلەرى اقش ازاماتى نەمەسە تۇراقتى رەزيدەنت بولىپ تابىلمايتىن بالالار اۆتوماتتى تۇردە ازاماتتىق المايدى.
ماسساچۋسەتس پەن نيۋ-گەمپشيردەگى ميگرانتتاردىڭ قۇقىقتارىن قورعايتىن بىرنەشە ۇكىمەتتىك ەمەس ۇيىمدار دا ترامپتىڭ جارلىعىن كونستيتۋتسياعا قايشى دەپ تانۋدى تالاپ ەتىپ، سوتقا شاعىم تۇسىرگەن.
ءىستى قاراعاندار جىل سايىن اقش-تا اتا-اناسى ەل ازاماتتارى ەمەس شامامەن 150 000 بالا دۇنيەگە كەلەتىنىن اتاپ ءوتتى. ولار بۇل جارلىق جۇزەگە اسىرىلعان جاعدايدا بالالاردىڭ مەديتسينالىق كومەككە قولجەتىمدىلىگىنەن ايىرىلىپ، دەپورتاتسيا قاۋپىنە ۇشىراۋى مۇمكىن ەكەنىن ەسكەرتتى.
اق ءۇي وكىلدەرى سوت پروتسەستەرىنە دايىن ەكەندىكتەرىن مالىمدەدى.
پرەزيدەنت ترامپ جارلىققا قول قويۋ كەزىندە ازاماتتىق الۋ قۇقىعىن "ويعا قونىمسىز" دەپ اتادى.
"كوپتەگەن شەتەلدىكتەر وسى نورمانى پايدالانىپ، اقش-قا كەلىپ بالا تۋىپ، ازاماتتىق الۋ مۇمكىندىگىن ىزدەيدى،" – دەدى ول.
