شىمكەنت سوتى قورعانىس مينيسترلىگىنىڭ تالابىن ءىشىنارا قاناعاتتاندىردى. وسىلايشا، ايىپتى دەپ تانىلعان ەكى سارباز بەن ەكى وفيتسەر 23 ميلليارد تەڭگە وتەۋگە مىندەتتەلدى، دەپ حابارلايدى “ادىرنا” ۇلتتىق پورتالى.
2021 جىلدىڭ 26 تامىزىندا جامبىل وبلىسى بايزاق اۋدانى قاينار جول تورابىندا ورنالاسقان №28349 اسكەري ءبولىمىنىڭ ينجەنەرلىك وق-دارىلەر قويماسىنىڭ بىرىنەن ءورت شىعىپ، ودان كەيىنگى جارىلىستارعا اكەلىپ سوقتىرعان. ناتيجەسىندە 18 ادام قازا تاۋىپ، بىرنەشە ادام زارداپ شەگىپ، سونداي-اق مەملەكەت پەن جەكە تۇلعالارعا اسا ءىرى مولشەردە زالال كەلتىرىلگەن.
“جاۋاپكەرلەردىڭ كىناسى شىمكەنت گارنيزونىنىڭ اسكەري سوتىنىڭ 2023 جىلعى 20 قازانداعى جانە قازاقستان رەسپۋبليكاسى اسكەري سوتىنىڭ قىلمىستىق ىستەر جونىندەگى سوت القاسىنىڭ 2024 جىلعى 13 ناۋرىزداعى زاڭدى كۇشىنە ەنگەن اپەللياتسيالىق سوت اكتىلەرىمەن دالەلدەنگەن”، - دەلىنگەن حابارلامادا.
جاۋاپكەرلەر اسكەري ءبولىمنىڭ تەحنيكالىق اۋماعىندا №14 ينجەنەرلىك وق-دارىلەردى ساقتاۋ قويماسىندا ءورت شىعۋىنا جول بەرگەندەرى، ياعني ولاردىڭ ءىس-ارەكەتتەرىنەن اسا ءىرى مولشەردە شىعىن كەلگەنى سوتپەن انىقتالعاندىقتان، كەلتىرىلگەن ماتەريالدىق زالالدى ورتاقتاسقان تۇردە 23 764 530 881تەڭگە مەملەكەت پايداسىنا ءوندىرۋ تۋرالى شەشىم قابىلداندى.
تالاپتىڭ 1 328 507 355 تەڭگە ءوندىرۋ تۋرالى بولىگى دالەلدەر بولماۋىنا بايلانىستى قاناعاتتاندىرۋسىز قالدىرىلدى.
شەشىم زاڭدى كۇشىنە ەنگەن جوق
ەستەرىڭىزگە سالا كەتەيىك، جارىلىستى قولدان جاسادى دەپ جاۋاپقا تارتىلعان اسەت ءاشىرباي مەن ەربولات تۇرانوۆ 13 جىلعا سوتتالعان. ءبولىم وفيتسەرلەرى اسلان باقىتجانوۆ پەن رۋسلان نەسىپقاليەۆ 5 جىلعا باس بوستاندىعىنان ايىرىلعان بولاتىن.
