بۇگىن ءماجىلىس دەپۋتاتتارى اقش-تىڭ الماتى قالاسىنداعى كونسۋلدىعىنىڭ عيماراتىن سالۋ ءۇشىن 70 مىڭ شارشى مەتردەن استام جەر ۋچاسكەسىن جالعا بەرۋ تۋرالى زاڭ جوباسىن تالقىلادى، دەپ حابارلايدى "ادىرنا" ۇلتتىق پورتالى.
دەپۋتات ايگۇل قۇسپان "قازاقستان رەسپۋبليكاسى ۇكىمەتى مەن امەريكا قۇراما شتاتتارى ۇكىمەتى اراسىنداعى اقش-تىڭ الماتى قالاسىنداعى كونسۋلدىق مەكەمەسىنىڭ عيماراتىن سالۋعا ارنالعان جەر ۋچاسكەسىن جالعا بەرۋ تۋرالى كەلىسىمدى راتيفيكاتسيالاۋ تۋرالى" زاڭ جوباسىن ۇسىندى.
دەپۋتاتتىڭ ايتۋىنشا، بۇل كەلىسىمگە 2024 جىلدىڭ 27 قىركۇيەگىندە نيۋ-يوركتە قول قويىلعان.
"كەلىسىمنىڭ ماقساتى – اقش ۇكىمەتىنە الماتى قالاسىندا كونسۋلدىق مەكەمەنىڭ عيماراتىن سالۋ جانە پايدالانۋ ءۇشىن 70 مىڭ شارشى مەتردەن استام جەر ۋچاسكەسىن 49 جىلعا جالعا بەرۋ. كەلىسىم نورمالارىندا جەر ۋچاسكەسىن بەرۋ ءتارتىبى مەن شارتتارى انىقتالعان. كوميتەت زاڭ جوباسىن جۇمىسقا الۋعا جانە وعان قورىتىندى دايىنداۋعا دايىن", – دەدى دەپۋتات.
2019 جىلى اقش-تىڭ سول كەزدەگى ەلشىسى ۋيليام موزەر الماتىدا جاڭا باس كونسۋلدىق عيماراتىن سالۋ جوسپارى تۋرالى حابارلاعان بولاتىن. قازىرگى ۋاقىتتا باس كونسۋلدىقتىڭ ەكى كەڭسەسى بار، الايدا ولار قاۋىپسىزدىك تالاپتارىنا سايكەس كەلمەيدى.
