ادام ءولتىرۋ، تۇرعىنجايعا قولسۇعىلماۋشىلىقتى بۇزۋ جانە زاڭسىز قارۋ اينالىمى ءۇشىن قىلمىستىق جاۋاپتىلىققا تارتۋ ماقساتىندا قازاقستاننىڭ ەكى ازاماتى رەسەيدەن ەكستراديتسيالاندى. بۇل تۋرالى باس پروكۋراتۋرانىڭ ءباسپاسوز قىزمەتى 20 قاڭتاردا ايتتى، دەپ حابارلايدى «ادىرنا» ءتىلشىسى.
2023 جىلدىڭ قاڭتارىندا شىمكەنت قالاسىندا 5 ادام تانىسىن ءولتىرۋدى جوسپارلاعان. بۇل ءۇشىن ولار تاپانشا، مەتالل شىبىقتار مەن بيتا الىپ، ۇيىنە بارعان.
«كۇدىكتىلەر تەرەزەلەردى سىندىرىپ، ۇيگە كىرىپ، جابىرلەنۋشىگە اسا قاتىگەزدىكپەن كوپتەگەن دەنە جاراقاتتارىن كەلتىرگەن. كەيىن ۇيدەگى باسقا ادامداردى ۇرىپ-سوعىپ، جابىرلەنۋشى ءومىر بەلگىلەرىن بەرمەگەنىنە كوز جەتكىزگەن سوڭ، وقيعا ورنىنان بوي تاسالاعان. جابىرلەنۋشى اۋىر دەنە جاراقات سالدارىنان جەدەل جاردەم كولىگىندە قايتىس بولعان»،—دەلىنگەن حابارلامادا.
كۇدىكتىلەردىڭ ەكەۋى ءىزىن سۋىتپاي ۇستالىپ، ءارتۇرلى جازالارعا تارتىلعان. ال قالعان ءۇش كۇدىكتى ەلدەن قاشىپ ۇلگەرىپ، حالىقارالىق ىزدەۋگە جاريالانعان.
2024 جىلدىڭ مامىرىندا سىبايلاستارىنىڭ ءبىرى كورشىلەس ەلدەن ەكستراديتسيالانىپ، سوتتالدى. قالعان ەكى ىزدەۋدەگى كۇدىكتى وتكەن جىلدىڭ شىلدەسىندە رەسەي فەدەراتسياسىنىڭ ماسكەۋ وبلىسىندا ۇستالىپ، قازاقستان باس پروكۋراتۋراسىنىڭ سۇراۋى بويىنشا ەلگە ەكستراديتسيالاندى.
قازىرگى تاڭدا كۇدىكتىلەر تەرگەۋ يزولياتورىنا قامالدى. ايىپتالىپ وتىرعان قىلمىستاردى جاساعانى ءۇشىن ولارعا 15 جىلدان 20 جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان.
