اقش-تا قاۋىپسىزدىك ماقساتىندا TikTok الەۋمەتتىك جەلىسىنىڭ جۇمىسىن توقتاتاتىن زاڭ كۇشىنە ەندى، دەپ حابارلايدى "ادىرنا" ۇلتتىق پورتالى.
بۇعان دەيىن قىتايلىق ByteDance كومپانياسىنا پلاتفورمانى ساتۋدى تالاپ ەتىپ، ونى ورىنداماعان جاعدايدا تىيىم سالىناتىنى ەسكەرتىلگەن ەدى.
زاڭ كۇشىنە ەنگەنگە دەيىن جەلى اقش-تاعى جۇمىسىن توقتاتتى. TikTok-تى اشۋعا تىرىسقان پايدالانۋشىلار قوسىمشانىڭ قولجەتىمسىز ەكەنى تۋرالى حابارلاما كورەدى.
اقش-تا TikTok-قا تىيىم سالاتىن زاڭ قابىلداندى. وكىنىشكە قاراي، بۇل ءسىزدىڭ TikTok-تى ۋاقىتشا پايدالانا المايتىنىڭىزدى بىلدىرەدى – دەلىنگەن قوسىمشاداعى حابارلامادا.
دونالد ترامپ كەشە NBC News جانە ABC تەلەارنالارىنا TikTok-قا 90 كۇنگە دەيىن ۋاقىتشا جەڭىلدىك بەرۋدى جوسپارلاپ وتىرعانىن ايتتى. اقش-تىڭ سايلانعان پرەزيدەنتى يناۋگۋراتسيادان كەيىن ءتيىستى مالىمدەمە جاساۋعا ۋادە ەتتى.
2024 جىلدىڭ ءساۋىر ايىندا اقش كونگرەسى ByteDance كومپانياسىن پلاتفورمانى امەريكالىق كومپانياعا ساتۋعا مىندەتتەيتىن زاڭ قابىلداعان ەدى. بۇل تالاپ ورىندالماعان جاعدايدا، الەۋمەتتىك جەلى 2025 جىلدىڭ 19 قاڭتارىنان باستاپ بۇعاتتالۋى كەرەك بولاتىن.
امەريكالىق شەنەۋنىكتەردىڭ پىكىرىنشە، قىتايلىق كومپانياعا تيەسىلى TikTok پەكينگە امەريكالىقتاردىڭ دەرەكتەرىن جيناپ، قوعامدىق پىكىرگە ىقپال ەتۋگە مۇمكىندىك بەرۋى مۇمكىن.
TikTok كومپانياسى مەن قىتاي ۇكىمەتىنىڭ اراسىندا بايلانىس بار دەگەن ايىپتاۋلاردى بىرنەشە رەت جوققا شىعاردى.
Bloomberg مالىمەتىنشە، ByteDance TikTok-تى يلون ماسككە ساتۋ مۇمكىندىگىن قاراستىرۋدا دەگەن سىبىستار تاراعانىمەن، كومپانيا بۇل اقپاراتتى «تازا قيال» دەپ جوققا شىعاردى.
10 قاڭتاردا اقش جوعارعى سوتىندا وتكەن تىڭداۋدا TikTok پەن كونتەنت جاساۋشىلاردىڭ وكىلدەرى بۇل تىيىم 170 ميلليوننان استام امەريكالىق قولدانۋشى ءۇشىن ءسوز بوستاندىعىن بۇزۋ بولاتىنىن مالىمدەدى.
TikTok قولدانۋشىلاردىڭ ورتاشا ۋاقىتى 2024 جىلى كۇنىنە 51 مينۋت بولعانىن ايتادى. الايدا اقش-تان تىس ايماقتارعا VPN ارقىلى قوسىلۋ نەمەسە باسقا امالداردى پايدالانۋ جولدارى ايتىلعان بەينەروليكتەر دە پايدا بولدى.
وتكەن جىلدىڭ جەلتوقسان ايىندا سايلانعان پرەزيدەنت دونالد ترامپ سوتتان بۇل ماسەلەنى اق ۇيگە ورالعانعا دەيىن كەيىنگە قالدىرۋدى سۇراعان. ول ماسەلەنى «ساياسي شەشىممەن» رەتتەۋگە تىرىسپاق ەكەنىن ايتقان.
TikTok بويىنشا شەشىم جاقىن ارادا قابىلدانادى، بىراق جاعدايدى تالداۋ ءۇشىن ۋاقىت قاجەت، – دەپ جازدى ترامپ 17 قاڭتاردا TruthSocial جەلىسىندە.
اق ءۇي زاڭدى جۇزەگە اسىرۋ ترامپقا جۇكتەلەتىنىن، ونىڭ 20 قاڭتاردا قىزمەتكە كىرىسەتىنىن راستادى.
