AQSh-ta qaýipsizdik maqsatynda TikTok áleýmettik jelisiniń jumysyn toqtatatyn zań kúshine endi, dep habarlaıdy "Adyrna" ulttyq portaly.
Buǵan deıin qytaılyq ByteDance kompanııasyna platformany satýdy talap etip, ony oryndamaǵan jaǵdaıda tyıym salynatyny eskertilgen edi.
Zań kúshine engenge deıin jeli AQSh-taǵy jumysyn toqtatty. TikTok-ty ashýǵa tyrysqan paıdalanýshylar qosymshanyń qoljetimsiz ekeni týraly habarlama kóredi.
AQSh-ta TikTok-qa tyıym salatyn zań qabyldandy. Ókinishke qaraı, bul sizdiń TikTok-ty ýaqytsha paıdalana almaıtynyńyzdy bildiredi – delingen qosymshadaǵy habarlamada.
Donald Tramp keshe NBC News jáne ABC telearnalaryna TikTok-qa 90 kúnge deıin ýaqytsha jeńildik berýdi josparlap otyrǵanyn aıtty. AQSh-tyń saılanǵan prezıdenti ınaýgýraııadan keıin tıisti málimdeme jasaýǵa ýáde etti.
2024 jyldyń sáýir aıynda AQSh kongresi ByteDance kompanııasyn platformany amerıkalyq kompanııaǵa satýǵa mindetteıtin zań qabyldaǵan edi. Bul talap oryndalmaǵan jaǵdaıda, áleýmettik jeli 2025 jyldyń 19 qańtarynan bastap buǵattalýy kerek bolatyn.
Amerıkalyq sheneýnikterdiń pikirinshe, qytaılyq kompanııaǵa tıesili TikTok Pekınge amerıkalyqtardyń derekterin jınap, qoǵamdyq pikirge yqpal etýge múmkindik berýi múmkin.
TikTok kompanııasy men Qytaı úkimetiniń arasynda baılanys bar degen aıyptaýlardy birneshe ret joqqa shyǵardy.
Bloomberg málimetinshe, ByteDance TikTok-ty Ilon Maskke satý múmkindigin qarastyrýda degen sybystar taraǵanymen, kompanııa bul aqparatty «taza qııal» dep joqqa shyǵardy.
10 qańtarda AQSh joǵarǵy sotynda ótken tyńdaýda TikTok pen kontent jasaýshylardyń ókilderi bul tyıym 170 mıllıonnan astam amerıkalyq qoldanýshy úshin sóz bostandyǵyn buzý bolatynyn málimdedi.
TikTok qoldanýshylardyń ortasha ýaqyty 2024 jyly kúnine 51 mınýt bolǵanyn aıtady. Alaıda AQSh-tan tys aımaqtarǵa VPN arqyly qosylý nemese basqa amaldardy paıdalaný joldary aıtylǵan beınerolıkter de paıda boldy.
Ótken jyldyń jeltoqsan aıynda saılanǵan prezıdent Donald Tramp sottan bul máseleni Aq úıge oralǵanǵa deıin keıinge qaldyrýdy suraǵan. Ol máseleni «saıası sheshimmen» retteýge tyryspaq ekenin aıtqan.
TikTok boıynsha sheshim jaqyn arada qabyldanady, biraq jaǵdaıdy taldaý úshin ýaqyt qajet, – dep jazdy Tramp 17 qańtarda TruthSocial jelisinde.
Aq úı zańdy júzege asyrý Trampqa júkteletinin, onyń 20 qańtarda qyzmetke kirisetinin rastady.
