وڭتۇستىك كورەيا پرەزيدەنتى يۋن سوك ءيولدىڭ جاقتاستارى ميتينگكە شىقتى، دەپ حابارلايدى "ادىرنا" ۇلتتىق پورتالى Yonhap اگەنتتىگىنە سىلتەمە جاساپ.
اگەنتتىكتىڭ مالىمەتىنشە، پرەزيدەنتكە قاماۋعا الۋ وردەرى بەرىلگەننەن كەيىن، ونىڭ جاقتاستارى سوت عيماراتىنىڭ تەرەزەلەرىن سىندىرىپ، ىشكە باسىپ كىرگەن. كەيبىرەۋلەرى پوليتسيا قىزمەتكەرلەرىنە قاراي پلاستيك ورىندىقتار، قوقىس جانە باسقا دا زاتتار لاقتىرعان.
پوليتسيا پرەزيدەنتتىڭ جاقتاستارى ميتينگ وتكىزگەن ايماقتاردا قاۋىپسىزدىكتى قامتاماسىز ەتۋ ءۇشىن جۇزدەگەن قىزمەتكەردى جۇمىلدىرعان.
قۇقىق قورعاۋ ورگاندارىنىڭ مالىمەتى بويىنشا، سەنبى كۇنى سوتتا تىڭداۋ ءوتىپ جاتقان عيماراتتىڭ ماڭىنا مەملەكەت باسشىسىن قولداۋعا شامامەن 44 مىڭعا جۋىق ادام جينالعان. ولار وڭتۇستىك كورەيا مەن اقش-تىڭ جالاۋلارىن ۇستاپ الىپ، پرەزيدەنتتىڭ اتىن ايتىپ ايعايلاعان. كەيبىر نارازىلىق بىلدىرۋشىلەر جىلاسا، باسقالارى پوليتسيامەن قاقتىعىسقا تۇسكەن.
تىڭداۋ اياقتالعاننان كەيىن يۋن تەرگەۋ يزولياتورىنا ورالۋ ءۇشىن سوت عيماراتىنان شىققاندا، ونىڭ جاقتاستارى تەرگەۋشىلەرگە تيەسىلى بولۋى مۇمكىن كولىكتەردى بوگەپ، ونى قاماۋعا العان سىبايلاس جەمقورلىققا قارسى تەرگەۋ باسقارماسىن تاراتۋعا شاقىرعان.
ولار كولىكتەردىڭ ەسىك تۇتقالارىن زاقىمداپ، دوڭگەلەكتەرىن تەسكەن.
ەسكە سالا كەتەيىك، 15 قاڭتار كۇنى وڭتۇستىك كورەيا پرەزيدەنتى يۋن سوك يول "بۇلىك جاسادى" دەگەن ايىپپەن قاماۋعا الىنعان ەدى.
