قازاقستان مۇسىلماندارى ءدىني باسقارماسى (قمدب) كيبەربۋللينگ پەن قورلاۋدىڭ كەز كەلگەن تۇرىنە شاريعات تۇرعىسىنان قاتاڭ تىيىم سالىناتىنىن مالىمدەپ، ارنايى ءپاتۋا شىعاردى، دەپ حابارلايدى "ادىرنا" ۇلتتىق پورتالى.
قمدب حابارلاماسىندا الەۋمەتتىك جەلىدە نەمەسە ۇيالى تەلەفون ارقىلى جالعان اقپارات تاراتۋ، بالاعاتتاۋ، قورلاۋ، ءتىپتى كيبەربۋللينگكە قاتىسىپ، «لايك» باسۋ سياقتى ارەكەتتەر كۇنا ءىس رەتىندە باعالاناتىنى ايتىلعان.
«كيبەربۋللينگكە جانە بۋللينگتىڭ كەز كەلگەن تۇرىنە شاريعات تۇرعىسىنان قاتاڭ تىيىم سالىنادى. الەۋمەتتىك جەلى، ۇيالى تەلەفون ارقىلى جالعان اقپارات تاراتۋ، ونى ءبولىسۋ، سونداي-اق بىرەۋدى بالاعاتتاپ، قورلاپ جازبا قالدىرۋ جانە وعان ورتاقتاسىپ «لايك» باسۋ – كۇنا ءىس.بىرەۋدىڭ جەكە جازبالارىن، سۋرەتتەرىن، بەينەجازبالارىن شىعارامىن دەپ قورقىتۋ، بىرەۋدىڭ ءدىنىن نە مادەنيەتىن كەمسىتۋ جانە ت.ب. كيبەربۋللينگتىڭ تۇرلەرىنە تىيىم سالىنادى»، – دەلىنگەن قمدب حابارلاماسىندا.
قمدب وكىلدەرى مۇنداي ارەكەتتەردىڭ ادامداردىڭ ار-نامىسىنا زيان كەلتىرىپ، قوعامدا الاۋىزدىق تۋدىرۋى مۇمكىن ەكەنىن ەسكەرىپ، ءاربىر مۇسىلماندى جاۋاپكەرشىلىككە شاقىردى.
«قورلاۋ، جالعان اقپارات تاراتۋ، ادامدى كەمسىتۋ – يسلام دىنىندە اۋىر كۇنا. ءاربىر ادام وزگەگە قۇرمەتپەن قاراپ، ادىلدىك پەن ىزگىلىككە ۇمتىلۋى ءتيىس»، – دەلىنگەن مالىمدەمەدە.
