قازاقستانداعى فۋتبول جانە حوككەي كلۋبتارىنا بولىنگەن قارجى ءتيىمسىز پايدالانىلعان، دەپ حابارلايدى “ادىرنا” ۇلتتىق پورتالى.
سوڭعى التى جىلدا قازاقستاندىق 18 فۋتبول كلۋبىنا مەملەكەتتىك بيۋدجەتتەن 200 ميللياردتان استام قاراجات بولىنگەن. بۇل تۋرالى قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى مالىمدەدى.
اگەنتتىك توراعاسىنىڭ ورىنباسارى ۇلان سارقۇلوۆ ءماجىلىس كۋلۋارىندا سپورتقا بولىنگەن قاراجاتتىڭ باسىم بولىگى شەتەلدىك لەگيونەرلەردىڭ جالاقىلارىنا جانە ءتيىمسىز شىعىندارعا جۇمسالعانىن ايتتى.
“200 ميلليارد تەڭگەدەن اسا قارجىنىڭ نەگىزگى بولىگى شەتەلدىك سپورتشىلارعا جالاقى تولەۋگە كەتىپ، سپورتتىق ينفراقۇرىلىمدى دامىتۋعا كوڭىل بولىنبەگەن. سوڭعى التى جىلدا بار بولعانى ەكى جاڭا ستاديون سالىندى، ال كوپ كلۋبتاردىڭ ينفراقۇرىلىمى مۇلدە ناشار جاعدايدا”، – دەدى سارقۇلوۆ.
اتاپ ايتقاندا، “استانا” فۋتبول كلۋبىنا 50 ميلليارد تەڭگە بولىنگەنىمەن، كلۋبتىڭ جەكە بازاسى جوق. سونىمەن قاتار، قارجىنىڭ 60-70%-ى بىرنەشە ماۋسىم عانا ويناعان لەگيونەرلەردىڭ جالاقىسىنا كەتكەنى بەلگىلى بولدى.
وسىعان ۇقساس جاعداي “بارىس” حوككەي كلۋبىندا دا بايقالعان. التى جىل ىشىندە كلۋبقا شامامەن 49 ميلليارد تەڭگە بولىنگەن، ونىڭ كوپ بولىگى شەتەلدىك ويىنشىلاردىڭ جالاقىسىنا جۇمسالعان. الايدا كلۋبتىڭ سوڭعى جىلدارداعى ناتيجەلەرى بولىنگەن قارجىعا سايكەس كەلمەيدى.
“بۇل قاراجاتتى سپورتتىق ينفراقۇرىلىمدى جاقسارتۋعا نەمەسە بالالار مەن جاستار سپورتىن دامىتۋعا جۇمساعان الدەقايدا ءتيىمدى بولار ەدى. بولاشاقتا كاسىبي سپورتشىلار ءدال وسى جاس ۇرپاق اراسىنان شىعاتىنى بەلگىلى”، – دەپ تولىقتىردى سارقۇلوۆ.
سونىمەن بىرگە، اگەنتتىك مادەنيەت جانە سپورت مينيسترلىگىنە سپورتقا بولىنەتىن قاراجاتتى ۇتىمدى پايدالانۋ بويىنشا ۇسىنىستار بەرگەنىن حابارلادى.
