رەسەيدىڭ تەرگەۋ كوميتەتى قازاقستان اۋماعىندا 39 ادامنىڭ قازا بولۋىنا جانە 28 ادامنىڭ دەنساۋلىعىنا زيان كەلتىرگەن «ازەربايجان اۋە جەلىلەرى» اۋە كومپانياسىنىڭ Embraer-E190 ۇشاعىنىڭ اپاتىنا بايلانىستى تەرگەۋ امالدارىن جالعاستىرىپ جاتىر، دەپ حابارلايدى “ادىرنا” ۇلتتىق پورتالى.
بۇل تۋرالى رف تەرگەۋ كوميتەتىنىڭ رەسمي وكىلى مالىمدەدى.
«رەسەيدىڭ تەرگەۋ كوميتەتى 2024 جىلعى 25 جەلتوقساندا قازاقستان رەسپۋبليكاسىنىڭ اۋماعىندا 39 ادامنىڭ قازا بولۋىنا جانە 28 ادامنىڭ دەنساۋلىعىنا زيان كەلتىرىلۋىنە (رف قك 263-بابى) اكەلگەن «ازەربايجان اۋە جەلىلەرى» اۋە كومپانياسىنىڭ Embraer-E190 ۇشاعىنىڭ اپاتقا ۇشىراۋى بويىنشا قىلمىستىق ءىستى تەرگەۋ امالدارىن جالعاستىرىپ وتىر»، – دەلىنگەن مالىمدەمەدە.
رف تەرگەۋ كوميتەتىنىڭ حابارلاۋىنشا، ديسپەتچەرلىك قىزمەت، اۋە قوزعالىسىن ۇيىمداستىرۋ جۇيەسى جانە اۋە شابۋىلىنا قارسى قورعانىس جۇيەسى لاۋازىمدى تۇلعالارىنىڭ ارەكەتىن باعالاۋ ءۇشىن كەشەندى ۇيىمداستىرۋ-تەحنيكالىق سوت-مەديتسينالىق ساراپتاما كوميسسياسى تاعايىندالعان.
مەملەكەتارالىق اۆياتسيا كوميتەتى، ازەربايجان مەن قازاقستان قۇزىرلى ورگاندارىمەن بىرلەسكەن تەرگەۋ جۇمىستارى ءجۇرىپ جاتىر.
«مەملەكەتارالىق اۆياتسيا كوميتەتىنىڭ ماماندارىمەن بىرلەسە وتىرىپ، برازيليانىڭ اۆياتسيالىق وقيعالاردى تەرگەۋ جانە الدىن الۋ ورتالىعىندا (SENIPA) ۇشاقتىڭ وزدىگىنەن جازعىش قۇرالىنداعى دەرەكتەر زەرتتەلۋ ۇستىندە»، – دەلىنگەن رەسمي حابارلامادا.
سونداي-اق گروزنىي، ماحاچكالا جانە مينەرالنىە ۆودى ديسپەتچەرلەرى مەن ۇشاق كومانديرى اراسىنداعى اڭگىمەلەر تالدانىپ جاتىر. اۋە كەمەسىنىڭ جۇيەلەرى مەن زاتتاي ايعاقتاردى زەرتتەۋ جۇمىستارى جالعاسۋدا.
تەرگەۋ كوميتەتى وقيعا سەبەپتەرىنە قاتىستى بارلىق ىقتيمال نۇسقالاردى قاراستىرىپ جاتقانىن اتاپ ءوتتى.
ەسكە سالساق، 2024 جىلعى 25 جەلتوقساندا اقتاۋ قالاسى ماڭىندا باكۋ-گروزنىي رەيسىن ورىنداعان AZAL-عا تيەسىلى جولاۋشىلار ۇشاعى اپاتقا ۇشىراعان ەدى. بورتتا بولعان 67 ادامنىڭ 39-ى قازا تاۋىپ، 28-ءى امان قالدى.
