رەسەي فەدەرالدىق قاۋىپسىزدىك قىزمەتى تۇمەن وبلىسى مەن قازاقستان اراسىنداعى شەكارانى ناقتىلاۋدى باستادى، دەپ حابارلايدى "ادىرنا" ۇلتتىق پورتالى «مەگا تيۋمەن»-گە سىلتەپ.
رەسەي فەدەرالدىق قاۋىپسىزدىك قىزمەتى تۇمەن وبلىسى مەن قازاقستان اراسىنداعى شەكارانى ناقتىلاۋ جۇمىستارىن جۇرگىزۋدى ۇيعاردى.
رەسەي فەدەراتسياسىنىڭ نورماتيۆتىك قۇقىقتىق اكتىلەر جوبالارىنىڭ رەسمي پورتالىندا «تۇمەن وبلىسى اۋماعىنداعى شەكارالىق ايماقتىڭ شەگىن ايقىنداۋ تۋرالى» جوباسى جاريالاندى. جوبا اۆتورلارىنىڭ پىكىرىنشە، بۇل شارا شەكارالاردى وڭتايلاندىرۋ جانە ناقتىلاۋ ءۇشىن قاجەت.
«قۇجات تۇمەن وبلىسى اۋماعىنداعى رەسەي مەن قازاقستان اراسىنداعى شەكارانىڭ كوورديناتتارىن انىقتاپ، ادامداردىڭ ءوتۋى مەن كولىك قۇرالدارىنىڭ شەكارالىق ايماققا كىرۋى ءۇشىن ورىندار مەن ۋاقىتتى بەلگىلەيدى»، — دەپ جازادى «ۆەدوموستي» باسىلىمى.
رەسەي فەدەراتسياسىنداعى تۇمەن وبلىسى قازاقستاننىڭ سولتۇستىك قازاقستان وبلىسىمەن شەكتەسەدى. شەكارادا قازاقستان جاعىنداعى «قىزىلجار» جانە رەسەيدەگى «كازانسكوە» شەكارالىق وتكەلدەرى جۇمىس ىستەيدى.
ايتا كەتەيىك، وسىنداي ءراسىم بىلتىر قاراشا ايىندا دا وتكىزىلگەن بولاتىن. سول كەزدە رەسەي تاراپى قازاقستاننىڭ سولتۇستىگىمەن شەكتەسەتىن چەليابى وبلىسىنداعى شەكارانى ناقتىلاعان ەدى.
