13 قاڭتار كۇنى بايان-ولگەي ايماعىندا جۇمىس ىستەيتىن قازاق ساياتشىلىق وداعى بۇركىتتەردى قۇتقارۋ كۇنىن اتاپ ءوتتى، دەپ حابارلايدى "ادىرنا" ۇلتتىق پورتالى مونتسامە اگەنتتىگىنە سىلتەمە جاساپ.
بۇل كۇنى ۇرعى كەشەنىندە كورمە اشىلىپ، كەزدەسۋ ۇيىمداستىرىلدى. وعان وسى ەلدەگى قازاق ساياتشىلىق وداعىنىڭ توراعاسى ب.بەكبولات، اتقارۋشى ديرەكتورى ا.اتناي، بۇركىتشىلەر ا.تۇرعىنبەك، ز.لۇحپان قاتىستى.
كەزدەسۋ بارىسىندا بۇركىتتەردى قورعاۋ جانە كوبەيتۋ ماسەلەلەرى، ءتۋريزمدى دامىتۋداعى بۇركىتشىلەردىڭ ءرولى جانە ولاردىڭ الەۋمەتتىك ماسەلەلەرىن شەشۋ جولدارى تالقىلاندى.
كورمەدە بۇركىتپەن اڭشىلىققا ارنالعان ءتۇرلى بۇيىمدار، فوتوسۋرەتتەر، كىتاپتار، 250 جىلدان استام تاريحى بار ەسكى بۇركىت استاۋى قويىلدى. اڭشى ز.لۇحپان اتا-باباسىنان مۇرا بولىپ قالعان استاۋدى كورمەگە سىيعا تارتتى.
بايان-ولگەي ايماعىندا 170-تەن استام بۇركىتشى بار.
سوڭعى جىلدارى موڭعوليادا «بۇركىت مەرەكەسى» وتكىزىلىپ كەلەدى.
