تاليبان قوزعالىسى باتىس ەلدەرىنەن، ونىڭ ىشىندە ناتو-عا مۇشە مەملەكەتتەردەن، 20 جىلدىق سوعىس كەزىندە زارداپ شەككەن اۋعاندىقتارعا رەپاراتسيا تولەۋدى تالاپ ەتتى، دەپ حابارلايدى "ادىرنا" ۇلتتىق پورتالى تاسس اگەنتتىگىنە سىلتەپ.
تاليباننىڭ رەسمي وكىلى زابيحۋللا ءمۋدجاحيدتىڭ ايتۋىنشا، اسكەري وككۋپاتسيا كەزىندە زورلىق-زومبىلىققا ۇشىراعاندارعا وتەماقى تولەنۋى ءتيىس.
بۇعان دەيىن بريتاندىق The Daily Telegraph گازەتى ۇلىبريتانيانىڭ ارنايى قىزمەتى (SAS) اۋعانستانداعى بەيبىت تۇرعىنداردى، سونىڭ ىشىندە بالالاردى قاساقانا ءولتىردى دەگەن ايىپتاۋلار تۋرالى جازعان. قوعامدىق تىڭداۋلار كەزىندە قۇپيا كۋاگەر (N1799 شيفرىمەن بەلگىلى) ۇلىبريتانيانىڭ ارنايى كۇشتەرى جاسوسپىرىمدەر مەن ەر ادامداردى ەشقانداي قاۋىپ توندىرمەسە دە، نىساناعا العانىن مالىمدەدى.
"اۋعانستاندا تەك بريتاندىقتار عانا ەمەس، ەۋرووداقتىڭ اتىنان ارەكەت ەتكەن 47 ەل دە اسكەري قىلمىس جاسادى. بۇل ءىستى تەرگەۋ ءۇشىن گااگا سوتى ارنايى كوميسسيا قۇرۋى ءتيىس. وتەماقى تولەۋمەن قاتار، ولار حالىقارالىق سوتتار الدىندا جاۋاپ بەرۋى كەرەك،" — دەپ مالىمدەدى اسكەري ساراپشى زالماي اۋعانيار ToloNews اگەنتتىگىنە بەرگەن سۇحباتىندا.
The Guardian باسىلىمى دا بريتان اسكەرىنىڭ اۋعانستانداعى اسكەري قىلمىستارى تۋرالى مالىمەتتەردى جاريالادى. باسىلىمنىڭ مالىمەتىنشە، 2010-2013 جىلدار ارالىعىندا گيلمەند پروۆينتسياسىنداعى ميسسيالار كەزىندە كەم دەگەندە 80 بەيبىت تۇرعىن قازا تاپقان. ءبىر بريتاندىق سارباز التى اي ىشىندە 35 بەيبىت اۋعان ازاماتىن ولتىرگەن.
تاليبان وكىلدەرى ۇلىبريتانيا جانە باسقا ناتو ەلدەرىنەن بىرنەشە ميلليارد دوللار كولەمىندە رەپاراتسيا تالاپ ەتەتىندەرىن العاش رەت 2021 جىلدىڭ كۇزىندە مالىمدەگەن ەدى.
تاليبان — قازاقستاندا جانە باسقا ەلدەردە تىيىم سالىنعان ۇيىم.
