مەملەكەت باسشىسىنىڭ جارلىعىمەن 2025 جىل جۇمىسشى ماماندىقتار جىلى دەپ جاريالاندى. وسىعان وراي اباي وبلىسىندا 300-گە جۋىق ءىس-شارانى قامتيتىن ايماقتىق جوسپار بەكىتىلدى. ول بيىلعى جىلدى ەڭبەك پەن كاسىپ مەرەكەسى رەتىندە بەلگىلەپ، وبلىستىڭ بارلىق قالالارى مەن اۋداندارىن قامتىماق. اباي وبلىسىندا بارلىعى 33 كوللەدج بار، وندا 21 مىڭنان استام ستۋدەنت ءبىلىم الۋدا. 2024-2025 جاڭا وقۋ جىلىندا وقۋعا قابىلدانعاندار سانى 5 900 ادامدى قۇراسا، ولاردىڭ 2 000-ى جۇمىسشى ماماندىقتى تاڭداعان. بۇگىندە وبلىستاعى 21 كوللەدجدە 5 444 ستۋدەنت جۇمىسشى ماماندىعى بويىنشا ءبىلىم الۋدا.
وقىتۋدىڭ تانىمال باعىتتارىنا مىنالار جاتادى: ەلەكتر جانە گاز دانەكەرلەۋشىلەرى، ەلەكترشى، سانتەحنيكتەر، قۇرىلىسشىلار، اسپازدار، تىگىنشىلەر، شاشتارازدار، سونىمەن قاتار تسيفرلىق تەحنولوگيالار سالاسىنداعى ماماندار. بۇل ماماندىقتارعا قىزىعۋشىلىق جىل سايىن ارتىپ، جۇمىسشىلارعا دەگەن سۇرانىستىڭ راستايدى.
وبلىستاعى 31 كوللەدجدە ستۋدەنتتەرگە كاسىپورىنداردا تەوريانى پراكتيكامەن ۇشتاستىرۋعا مۇمكىندىك بەرەتىن دۋالدى وقىتۋ جۇيەسى ەنگىزىلگەن. وسى جۇيە اياسىندا 70 ماماندىقتا 3 060 ستۋدەنت ءبىلىم الۋدا. سونداي-اق 20 كوللەدج 22 كاسىپورىنمەن مەموراندۋمعا وتىردى، سونىڭ ارقاسىندا 4 200 ستۋدەنت جۇمىس بەرۋشىلەردىڭ دەمەۋشىلىگىمەن وقۋعا مۇمكىندىك الدى.
بيىلدىڭ وزىندە وبلىستاعى كوللەدجدەردە سلەسارلار، توكارلار، ەلەكترشىلەر مەن مەرچەندايزەرلەردى قوسا العاندا، جاڭا ماماندىقتار اشۋ جوسپارلانۋدا.
بۇگىندە جوعارى سىنىپ وقۋشىلارىنا ارنالعان ءبىلىم بەرۋ باعدارلامالارى پيلوتتىق رەجيمدە جۇزەگە اسىرىلۋدا. جالپى ءبىلىم بەرەتىن مەكتەپتەردىڭ 10-11 سىنىپ وقۋشىلارى ءبىر مەزگىلدە كوللەدج ديپلومىن الا الادى. وتكەن وقۋ جىلىندا جوباعا ەكى وقۋ ورنى قوسىلدى: جوعارى گەودەزيا، كارتوگرافيا جانە قۇرىلىس كوللەدجى مەن بيزنەس جانە سەرۆيس كوللەدجى. 2024-2025 جىلدارى كولىك كوللەدجى مەن بەسقاراعاي كوللەدجىندە ەكسپەريمەنتتىك توپتار اشىلدى.
سونىمەن قاتار، اباي وبلىسىنداعى كوللەدج ستۋدەنتتەرى WorldSkills چەمپيوناتتارىندا ءداستۇرلى تۇردە جەتەكشى ورىنداردى يەلەنەدى. وبلىس قۇراماسى ەكى جىل قاتارىنان ەل بىرىنشىلىگىندە ۇزدىك بولىپ كەلەدى.
