پرەزيدەنت قاسىم-جومارت توقاەۆ ەلورداداعى بىرقاتار نىساندى ارالاپ كوردى. بۇل تۋرالى بۇگىن، 6 قاڭتاردا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى
مەملەكەت باسشىسى، ەڭ الدىمەن، Kazakhstan International School Astana (KIS Astana) مەكتەبىنە باردى. 20 مىڭ شارشى مەتردەن استام اۋماقتا ورنالاسقان ءبىلىم بەرۋ مەكەمەسى 800 وقۋشىعا جانە مەكتەپ جاسىنا دەيىنگى 120 بالاعا ەسەپتەلگەن. مەكتەپ حالىقارالىق باكالاۆريات (IB) اككرەديتاتسياسىنان وتكەن. بۇل بەدەلدى باعدارلاما ءۇش باعىتتى قامتيدى. اتاپ ايتقاندا، 5-تەن 10 جاسقا دەيىنگى بالالارعا ارنالعان باستاۋىش (Primary Years Programme, PYP), 11-دەن 16 جاسقا دەيىنگى بالالارعا ەسەپتەلگەن ورتا (Middle Years Programme, MYP) جانە 16-19 جاس ارالىعىنداعى ەرەسەك وقۋشىلارعا بەيىمدەگەن ديپلومدىق وقۋ باعدارلاماسى (Diploma Programme, IB) بار.
مەملەكەت باسشىسى قازاقستاندا ءبىلىم بەرۋ دەڭگەيىن ارتتىرۋدىڭ ماڭىزدى ەكەنىن اتاپ ءوتتى. اسىرەسە، جاس بۋىننىڭ باسەكەگە قابىلەتىن شىڭداۋدا ءارى جان-جاقتى دامىتۋدا وسىنداي وقۋ ورىندارى ەرەكشە ءرول اتقاراتىنىنا نازار اۋداردى.
سونداي-اق قاسىم-جومارت توقاەۆ QazSwimAcademy سپورت ورتالىعىنىڭ جۇمىسىمەن تانىستى. ورتالىق ديرەكتورىنىڭ ايتۋىنشا، بىرەگەي كەشەندە سپورتشىلاردى دايارلاۋعا قاجەتتى بارلىق جاعداي جاسالعان. ەرەسەكتەر مەن بالالار ۇزىندىعى ءارتۇرلى بەس باسسەيندە جاتتىعا الادى. ونىڭ ءبىرى 50 مەترلىك بولسا، ەكەۋى 25 مەترلىك جانە ەكەۋى 10 مەترلىك ءجۇزۋ جولاقتارى بار باسسەيندەر. توپتىق جاتتىعۋلار 25 باعىت بويىنشا جۇرگىزىلەدى. سونىمەن قاتار مۇندا كاسىبي جاتتىعۋ زالى دا بار.
پرەزيدەنت جاس سپورتشىلارمەن اڭگىمەلەسىپ، مەملەكەت سپورت ينفراقۇرىلىمدارىن دامىتۋعا ەرەكشە ءمان بەرەتىنىن ايتتى.
– كەلەشەكتە تابىستى بولۋلارىڭىزعا جانە وليمپيادا چەمپيونى اتانۋلارىڭىزعا تىلەكتەسپىن. سپورتتىڭ دەنساۋلىقتى جاقسارتۋدا، سونداي-اق حالىقارالىق جارىستاردا ەلىمىزدىڭ داڭقىن شىعارۋدا ماڭىزى وتە زور. سىزدەردىڭ جەڭىمپاز سپورتشى ءارى ەلىمىزدىڭ لايىقتى ازاماتى بولاتىندارىڭىزعا سەنەمىن، –دەدى ول.
