Prezident Qasym-Jomart Toqaev elordadaǧy bırqatar nysandy aralap kördı. Būl turaly bügın, 6 qaŋtarda Aqordanyŋ baspasöz qyzmetı jazdy, dep habarlaidy «Adyrna» tılşısı
Memleket basşysy, eŋ aldymen, Kazakhstan International School Astana (KIS Astana) mektebıne bardy. 20 myŋ şarşy metrden astam aumaqta ornalasqan bılım beru mekemesı 800 oquşyǧa jäne mektep jasyna deiıngı 120 balaǧa eseptelgen. Mektep halyqaralyq bakalavriat (IB) akkreditasiiasynan ötken. Būl bedeldı baǧdarlama üş baǧytty qamtidy. Atap aitqanda, 5-ten 10 jasqa deiıngı balalarǧa arnalǧan bastauyş (Primary Years Programme, PYP), 11-den 16 jasqa deiıngı balalarǧa eseptelgen orta (Middle Years Programme, MYP) jäne 16-19 jas aralyǧyndaǧy eresek oquşylarǧa beiımdegen diplomdyq oqu baǧdarlamasy (Diploma Programme, IB) bar.
Memleket basşysy Qazaqstanda bılım beru deŋgeiın arttyrudyŋ maŋyzdy ekenın atap öttı. Äsırese, jas buynnyŋ bäsekege qabıletın şyŋdauda ärı jan-jaqty damytuda osyndai oqu oryndary erekşe röl atqaratynyna nazar audardy.
Sondai-aq Qasym-Jomart Toqaev QazSwimAcademy sport ortalyǧynyŋ jūmysymen tanysty. Ortalyq direktorynyŋ aituynşa, bıregei keşende sportşylardy daiarlauǧa qajettı barlyq jaǧdai jasalǧan. Eresekter men balalar ūzyndyǧy ärtürlı bes basseinde jattyǧa alady. Onyŋ bırı 50 metrlık bolsa, ekeuı 25 metrlık jäne ekeuı 10 metrlık jüzu jolaqtary bar basseinder. Toptyq jattyǧular 25 baǧyt boiynşa jürgızıledı. Sonymen qatar mūnda käsıbi jattyǧu zaly da bar.
Prezident jas sportşylarmen äŋgımelesıp, memleket sport infraqūrylymdaryn damytuǧa erekşe män beretının aitty.
– Keleşekte tabysty bolularyŋyzǧa jäne olimpiada chempiony atanularyŋyzǧa tılektespın. Sporttyŋ densaulyqty jaqsartuda, sondai-aq halyqaralyq jarystarda elımızdıŋ daŋqyn şyǧaruda maŋyzy öte zor. Sızderdıŋ jeŋımpaz sportşy ärı elımızdıŋ laiyqty azamaty bolatyndaryŋyzǧa senemın, –dedı ol.
